SQO-da bıyl 125 kópbalaly otbasy baspanaly bolady
Soltústik Qazaqstan oblysy ákimi baspasóz qyzmetiniń málimetinshe, bıyl turǵyn úı qurylysyna bıýdjetten ǵana 18 mlrd teńge bólindi, bul – byltyrǵymen salystyrǵanda ol 1,5 ese kóp. Nátıjesinde 300 myń sharshy metr – 3 myń páter berilip, 11 myń soltústikqazaqstandyq jyl sońyna deıin baspanaly bolady. Onyń 625-i áleýmettik jaǵdaıy nashar otbasylarǵa, sonyń ishinde 125-i – kópbalaly otbasylarǵa berildi.
Búgin SQO ákimi Qumar Aqsaqalov Petropavldaǵy 2-Pervomaı kóshesinde qurylysy aıaqtalǵan kópqabatty úılerge baryp, páter ıelerimen kezdesti.
«Osy Pervomaı kóshesinde byltyr ǵana eki qabatty apattyq jaǵdaıdaǵy 4 úıde 32 otbasy turdy. Olardyń barlyǵynyń jaǵdaıyn jasap, jańa úı berip, onyń ornyna 186 páteri bar eki 5 qabatty úı turǵyzyp, tabystadyq. Páterler turǵyn úıge ákimdik kezeginde turǵan otbasylarǵa berildi. Olardyń ishinde kópbalaly analar, múgedekter, Aýǵan soǵysynyń ardagerleri, tolyq emes otbasylar jáne jetim balalar bar», - dedi Qumar Aqsaqalov.
Petropavlda eski úılerdi súrý jumystary jalǵasady. Sońǵy úsh jylda 1 myńnan astam baspana syrylyp, onyń ornyna jańa úıler salyndy. Bul jumystar kelesi jyly da jalǵaspaq.
«Kelesi jyly Petropavlda baspanaǵa kezekte turǵandarǵa 556 páteri bar 5 úı tapsyrylady. Onyń 130-yn kópbalaly analar alady. Bul jumys oblys ortalyǵynda ǵana emes, 5 aýdanda da atqarylyp jatyr. Osylaısha Novoıshımka, ıAvlenka, Sergeevka, Beskól men Býlaevta 7 úı turǵyzyldy», - deıdi óńir basshysy.
Oblys ákiminiń aıtýynsha, N.Nazarbaev jáne Ýálıhanov kósheleriniń arasynda eski úıler óte kóp. Qalanyń kórkin qashyrǵan ol úılerdiń barlyǵy buzylyp alynbaq. Ornyna úlken sport saraıyn jáne úlken saıabaq salý josparlanǵan.
«Bul yqshamaýdan keleshekte tanymastaı ózgeredi. Ýálıhanov kóshesin keńeıtemiz. Kún jylynysymen-aq bul jumystar qolǵa alynady. Qazir kóshe boıyna kópqabatty úıler salynyp jatyr», - deıdi Qumar Aqsaqalov.
