SQO-da bıyl 105 myń ga jýyq jer memleketke qaıtaryldy

PETROPAVL. QazAqparat – Soltústik Qazaqstan oblysynda jerdi tıimsiz paıdalanǵandarǵa bıyl 1,6 mln teńgeden astam aıyppul salyndy, olqylyqtardy joıýǵa 23 uıǵarym berilip, qujattar memlekettik kirister departamentine 20 eselengen kólemde salyq salý úshin jiberildi, dep habarlaıdy QazAqparat tilshisi.

SQO Jer resýrstaryn basqarý departamentiniń basshysy Baqytjan Bekishtiń aıtýynsha, 65,5 myń ga aýyl sharýashylyǵy maqsatyndaǵy jerge 32 tekserý júrgizildi. Sonyń shamamen 38 myń ga boıynsha 23 zań buzýshylyq anyqtaldy, negizinen jaıylymdyq jerlerge qatysty. Máselen, byltyr 375,4 myń ga alqapta 96 zań buzýshylyq anyqtaldy, onyń 107 myń ga egistik, 269,4 myń ga jaıylymdyq jer boıynsha.

«Zań buzýshylyqtardy joıý týraly 23 uıǵarym berildi, olar memlekettik kirister departamentine 20 esege ulǵaıtylǵan salyq stavkasyn qoldaný úshin jiberildi. Budan basqa 1 638,75 myń teńge somasyna 20 aıyppul salyndy. Onyń 17-si boıynsha 1 224,75 myń teńge óndirilip alyndy.

Jalpy bıyl SQO-da jospar boıynsha paıdalanylmaı jatqan jerlerdiń 330 myń ga qaıtarylýy tıis», - deıdi Baqytjan Bekish.

Qazirgi ýaqytta oblys boıynsha 104,7 myń ga, onyń ishinde 7,5 myń ga egistik, 90,1 myń ga jaıylym nemese josparlanǵan aýmaqtyń 31,7 % qaıtaryldy.