SQO-da bıyl 10 sút fermasy paıdalanýǵa beriledi
PETROPAVL. QazAqparat – Soltústik Qazaqstan oblysyn keshendi damytý baǵdarlamasy aıasynda mal sharýashylyǵyna 15 mlrd teńge bólingen. Bul qarajatqa sút fermalaryn, qus fabrıkalaryn, jylyjaı keshenderin salý sııaqty birqatar joba júzege asyrylmaq, dep habarlaıdy QazAqparat tilshisi.
SQO ákiminiń birinshi orynbasary Marat Tasmaǵanbetov Óńirlik kommýnıkatsııalar qyzmetinde ótken brıfıngide atqarylǵan jumysty qorytyndylap, bolashaqqa josparlarmen bólisti.
Óńirde mal sharýashylyǵyn damytýǵa basymdyq berilmek. SQO-ny keshendi damytý baǵdarlamasy aıasynda bul salaǵa 15 mlrd teńge bólinbekshi. Bul qarajatqa jańa jobalar júzege asyrylady. Sonyń ishinde sút fermalarynyń, qus fabrıkalarynyń, jylyjaı keshenderiniń qurylysy da bar.
«Sońǵy úsh jylda oblysta 12 sút kesheni salynyp, paıdalanýǵa berildi. Bıyl 8 aýdanda taǵy osyndaı 16 fermanyń qurylysy júrip jatyr. Olardyń 10-y bıyl qoldanysqa enedi. Al Ýálıhanov jáne Aqjar aýdandarynda 13 myń qara malǵa shaqtalǵan iri bordaqylaý alańy salynady. Budan basqa jylyna 6 myń tonna et óndiretin 2 qus fabrıkasynyń qurylysy bastaldy», - deıdi Marat Tasmaǵanbetov.
SQO-daǵy qaıta óńdeý kásiporyndary da qaıta jetildirilip jatyr. «Maslodel» JShS eki jańa jeli qosyldy. Jaqynda qaımaq shyǵaratyn jańa qondyrǵy iske qosylady. Nátıjesinde kásiporynnyń qýaty artyp, jylyna 119 myń tonnaǵa deıin shıkizat óńdemek.
Al «Evrazıan Mılk» JShS-gi syr men sút óndiretin jańa sheteldik qondyrǵyny ornatyp jatyr. Nátıjesinde kásiporyn táýligine 70 tonnaǵa deıin shıkizatty óńdeıtin bolady.
«Oblysta qus fabrıkalarynyń jumysy qalpyna keltirildi. Jyl basynda óńirge 1,3 mln balapan ákelindi. Taǵy 700-i jetkizilmek. Nátıjesinde jumyrtqamen oblys 100% qamtylady. Jalpy bıyl aýyl sharýashylyǵy ónimderin 4% arttyrý mejesi qoıylǵan», - deıdi SQO ákiminiń birinshi orynbasary Marat Tasmaǵanbetov.
