SQO-da birneshe urlyq jasaǵan ınternet-alaıaq ustaldy
PETROPAVL. QazAqparat – Soltústik Qazaqstan oblysynda polıtseılerdiń «Hi-tech» jedel-profılaktıkalyq is-sharasy ótip jatyr, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, «Hi- tech» jedel-profılaktıkalyq is-sharasy kıberalaıaqtyqpen kúsheıtilgen rejımde jumys isteýge múmkindik berip, jaqsy nátıje berdi.
Almaty qalasyna issaparǵa jiberilgen Petropavldyń krımınaldyq polıtseıleri ońtústik astananyń 27 jastaǵy turǵynyn ustaǵan. Onyń oblys ortalyǵynyń turǵyndaryna qatysty kıberalaıaqtyqtyń 3 epızodyna qatysy bar bolýy múmkin.
Jas jigit ınternetke gúl satý jáne ony jetkizý týraly habarlandyrý ornalastyrǵan. 10-12 myń teńge aldyn ala tólem jasaýdy talap etip, aqshany alǵan soń baılanysty úzgen.
Atalǵan faktiler «Alaıaqtyq» baby boıynsha Sotqa deıingi tergep- tekserýlerdiń biryńǵaı tizilimine engizildi. Tergeý áreketterin júrgizý úshin almatylyq Petropavlǵa jetkizildi. Ustalǵannyń uqsas qylmystarǵa qatysy bary tekserilip jatyr.
«Polıtsııa qyzmetkerleriniń turaqty júrgizgen túsindirý jumysy arqasynda soltústikqazaqstandyqtardyń kóbi ınternette saýda jasaý kezinde ózderin qalaı ustaý kerektigin bildi. Degenmen, aldyn ala tólemdi talap etip aldaý - keń taraǵan stsenarııleriniń biri bolyp qala beredi. Aldaý túrleri jetkilikti, eń bastysy, qandaı jaǵdaı bolmasyn eshkimge jeke derekter men qupııa málimetter: bank kartalarynyń nómiri men cvv-kodyn, sms arqyly keletin qol jetkizý kodynyń qupııa sózderin jibermeý qajettigin esten shyǵarmaǵan jón», - deıdi SQO PD krımınaldyq polıtsııa basqarmasynyń bastyǵy Petr Klımov.
Operatsııa bastalǵannan beri polıtseıler kıberalaıaqtyq jasaǵan 7 kúdiktini anyqtady.
