SQO-da birneshe stýdent ınternet-alaıaqtardyń quryǵyna túsken

PETROPAVL. QazAqparat – Soltústik Qazaqstan oblysynda birneshe stýdent uzaq merzimge páter jaldaımyz dep ınternet-alaıaqtarǵa aldandy, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, jyl basynan Petropavlda stýdentterge qatysty jasalǵan 4 ınternet-alaıaqtyq faktisi tirkeldi. Barlyq jaǵdaıda jábirlenýshiler OLX saıty arqyly uzaq merzimge jalǵa alýǵa baspana izdestirgen. Arzan baǵaǵa qyzyqqan stýdentter kórsetilgen nómir boıynsha qońyraý shalǵan. «Páter ıesi» páterin suraýshylardyń kóptigin aıtyp, ony tek aldyn ala tólem jasaǵanǵa ǵana jalǵa beretinin aıtqan. Aram oıy joq stýdentter aqshany kórsetilgen shotqa aýdarǵan, qarajat qolǵa túsisimen «úı ıesi» qońyraýlarǵa jaýap bermeı, joǵalǵan. Qazirgi ýaqytta polıtseıler qaskóılerdi anyqtaý boıynsha jedel-izdestirý is-sharalaryn júrgizip jatyr.

Jastardy eskertý maqsatynda petropavldyq polıtseıler qala kolledjderiniń shákirtterimen kezdesti. Tártip saqshylary alaıaqtar jıi qoldanatyn aıla-tásilder jaıynda aıtyp, qylmystyń bul túrine qandaı jaýapkershiliktiń barlyǵyn, alaıaqtarǵa kezikken kezde qandaı áreket jasaý qajettigi týraly eskertti. Jastardyń suraqtaryna jaýap berip, arnaıy profılaktıkalyq jadynamalar jáne býkletter taratty.

Polıtseılerdiń aıtýynsha, ótken jylmen salystyrǵanda ınternet-alaıaqtyq eki ese artyp, bıyl oblys ortalyǵynda 60-tan astam qylmys tirkelgen.