SQO-da birneshe ret kólikti mas kúıde basqarǵan 37 júrgizýshi sottaldy

PETROPAVL. QazAqparat – Bıyl Soltústik Qazaqstan oblysynda kólikti basqarýǵa quqyǵy bolmasa da rólge mas kúıde otyrǵan 37 júrgizýshi sottaldy, dep habarlaıdy QazAqparat tilshisi.

SQO Polıtsııa departamenti baspasóz qyzmetiniń málimetinshe, Aqjar aýdandyq soty osy aýdannyń 42 jastaǵy turǵynyn bir jylǵa bas bostandyǵynan aıyrýǵa úkim shyǵardy. Ol bıyl aqpan aıynda kólikti mas kúıde júrgizgeni úshin 15 táýlikke ákimshilik qamaqqa alynǵan jáne 7 jylǵa kólik basqarý quqyǵynan aıyrylǵan. Osy jyldyń shilde aıynda polıtseıler ony taǵy toqtatady, ol kólik júrgizýge quqyǵy bolmasa da «Lada Priora»-nyń rýline mas kúıde otyrǵan.

Sot ony qoǵamdyq jumystarǵa tartyp, ómir boıyna kólik basqarý quqyǵynan aıyrdy. Alaıda qarasha aıynda er adam taǵy mas kúıde kólikti júrgizip, Gorkovskoe eldi mekenindegi metall arkany zaqymdaǵan. Bul joly sot ony bir jylǵa bas bostandyǵynan aıyrdy.

«Jyl basynan «Kólik quraldaryn basqarý quqyǵynan aıyrylǵan jáne alkogoldik, esirtkilik jáne (nemese) ýytqumarlyq masań kúıdegi adamnyń kólik quralyn basqarýy, sol sııaqty kólik quralyn basqarýdy osyndaı adamǵa berý nemese kólik quralyn osyndaı adamnyń basqarýyna jol berý» baby boıynsha 73 derekti tergedik. Qazirgi ýaqytta 37 adam sottaldy. Onyń ishinde tórteýine zańnamadaǵy ózgerister kúshine engenge deıin jaza qoldanylyp, aıyppul salyndy, qoǵamdyq jumystarǵa tartyldy. 30 adamnyń bas bostandyǵy shektelse, úsheýi qamaýǵa alyndy», - deıdi SQO PD Anyqtaý basqarmasynyń bastyǵy Erbol Bekturov.