SQO-da birneshe emdeý mekemesi kópsalaly oblystyq aýrýhana bolyp qaıta quryldy
PETROPAVL. QazAqparat – Soltústik Qazaqstan oblysynda bes emdeý mekemesi biriktirilip, budan bylaı oblystyq aýrýhana negizinde jumys isteıdi, dep habarlaıdy QazAqparat tilshisi.
SQO-da densaýlyq saqtaý salasynda ońtaılandyrý júrip jatyr. Buǵan deıin jeke dara jumys istep kelgen aýrýhanalar oblystyq aýrýhanaǵa biriktirilip, kópsalaly oblystyq aýrýhana bolyp qaıta quryldy. Olar - teri-venerologııalyq dıspanser, oblystyq perınataldyq ortalyq, kardıologııalyq ortalyq jáne onkologııalyq dıspanser.
«Bul ońtaılandyrýdyń mamandarǵa qatysy joq. Biraq, bir aýrýhanada bes birdeı bas býhgalter nemese sonsha bas ekonomıst bolýy múmkin emes. Olardyń barlyǵyna laıyqty qyzmetter usynyldy. Olardyń barlyǵy burynǵy jerde, biraq basqa qyzmetterde eńbek etip jatyr. Eńbekaqylaryn joǵary deńgeıde qaldyrýǵa, barynsha áleýmettik shıeleniske jol bermeýge tyrystyq», - dedi densaýlyq saqtaý basqarmasynyń jetekshisi Tımýr Sultanǵazıev.
Buǵan deıin Petropavl qalasynda kópsalaly zamanaýı aýrýhananyń qurylysy bastalǵanyn aıtqan edik. Nysandy túrikter Manısa qalasyndaǵy klınıkaǵa uqsas etip salmaq. Jaqynda soltústikqazaqstandyq delegatsııa Túrkııaǵa sapar shegip, óńirde salynyp jatqan aýrýhananyń analogymen tanysty.
