SQO-da birneshe aýdannyń kóktemgi sý tasqynyna daıarlyǵy tekserildi
PETROPAVL. QazAqparat – Soltústik Qazaqstan oblysynda «Kóktem-2020» respýblıkalyq komandalyq-shtabtyq oqý-jattyǵýy ótip jatyr, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń habarlaýynsha, Shal aqyn aýdanynda oblystyq TJD bólimsheleriniń, jergilikti atqarýshy organdardyń, azamattyq qorǵaý qyzmetteriniń jeke quramynyń kóktemgi sý tasqynyna daıyndyǵy tekserildi.
Aqtóbe oblysy TJD azamattyq qorǵanys bóliminiń bastyǵy Rýslan Sahıev aýdandyq tótenshe jaǵdaılar bólimi men № 20 órt sóndirý bólimi jeke quramynan fýnktsıonaldyq mindetterin, sý tasqyny kezindegi is-áreketterin surap bildi. Sý basqan aýmaqtarda avtonomdy jumys isteý qajettiligi bolýyn nazarǵa alyp, qyzmetkerlerdiń kıim-keshegi, «dabyl chemodandarynyń» jıyntyǵy tekserildi. Sý tasqynyna qarsy is-sharalarǵa qatysty qujattar da eskerýsiz qalmady.
Shal aqyn aýdanyndaǵy Sergeev sý torabynyń jumysy da pysyqtaldy. Aýdan ákimi Nurlan Esimov gıdrotehnıkalyq qurylyspen tanystyryp, sý tasqyny kezindegi onyń jumys jaǵdaıy týraly aıtty. Mańyzdy nysannyń jáne aýdan ortalyǵy – Sergeevkanyń habarlaý júıesi tekserildi.
Budan ári josparǵa sáıkes jumys toby Qyzyljar aýdany, Novonıkolskoe eldi mekenine bardy. Kóktem saıyn sý tasqyny kezinde eldi meken men tas joldy jalǵaıtyn kópirdiń ústinen sý ótetin. Byltyr jańa kópir paıdalanýǵa berildi. Aýyldyq okrýg ákimi Elena Zaharova eldi mekendi sý tasqynynan qorǵaý jónindegi is-sharalar týraly esep berdi.
Sonymen qatar, sapar barysynda sý tasqynyna qarsy is-sharalardy ótkizý, qaýipti aýmaqtan qardy shyǵarý boıynsha atqarylǵan jumystar jóninde Qyzyljar aýdany Báıterek aýyldyq okrýgi jáne Mamlıýt aýdany Mamlıýtka qalasy ákimderi esep berdi. Órt sóndirý bólimderiniń sý tasqyny kezinde paıdalanýǵa arnalǵan sý sorǵysh tehnıkalary tekserildi.
SQO-da «Kóktem-2020» respýblıkalyq komandalyq-shtabtyq oqý-jattyǵýy erteń de jalǵasady.
