SQO-da birqatar nysannyń jumysy isteýine ruqsat beriledi
PETROPAVL. QazAqparat – Soltústik Qazaqstan oblysynda karantındik shekteýler jeńildetiledi. Búgin óńirdiń bas sanıtar dárigeriniń jańa qaýlysy shyqty, - dep habarlaıdy QazAqparat tilshisi.
SQO-nyń bas sanıtar dárigeri Áset Jumataevtyń qol qoıǵan qaýlysyna sáıkes endi jeksenbiden basqa kúnderi saýda-oıyn-saýyq ortalyqtary, saýda úıleri saǵat 10.00-den 24.00-ge deıin jumys isteıdi.
Bazarlar jeksenbiden basqa kúnderi saǵat 9.00-den 20.00-ge deıin ashylady. Biraq saýda oryndary kelýshiler sanyn 30 %-dan asyrmaı, 4 sharshy metrde 1 adamnyń bolýyn qadaǵalaýy qajet.
Fıtnes, trenajer zaldary aldyn ala jazylý boıynsha, sport nysandary jeke jáne toptyq jattyǵýlardy 5 adammen, nátıjesinde adam sanyn 50-den asyrmaı, jobalyq qýatynyń tek 30 % ǵana toltyryp kelýshi qabyldaı alady. Jeksenbiden basqa kúnderi basseınder de jumysyn bastaıdy. Munda da sanıtarlyq talaptar qatań saqtalýy kerek.
Qoǵamdyq monshalar, saýnalar saǵat 9.00-den 22.00-ge deıin adam sanyn 50-den asyrmaı, 4 sharshy metrde 1 adamnyń bolýyn qadaǵalaý arqyly isteıdi, al jeksenbi kúnderi qoǵamdyq monshalardyń tek ortaq zaldary ǵana ashyq bolady.
Qoǵamdyq kólikke, sonyń ishinde qala mańyndaǵy marshrýttarǵa tańǵy saǵat 6.30-dan 22.00-ge deıin jumys isteýge, qalaaralyq, oblysaralyq avtobýstarǵa 300 shaqyrym aýmaqta qatynaýǵa ruqsat berildi.
Qoǵamdyq tamaqtaný oryndary, sonyń ishinde saýda-oıyn-saýyq ortalyqtaryndaǵy fýd-kort saǵat 8.00-den 24.00-ge deıin sanıtarlyq talaptardy saqtaı otyryp, ıaǵnı kelýshi sanyn asyrmaı ashylady. Sondaı-aq daıyn tamaqty jetkizý qyzmetteriniń de jumysy saǵat 8.00-den 24.00-ge deıin ulǵaıtyldy.
SQO-nyń bas sanıtar dárigeriniń jańa qaýlysy 13 aqpan saǵat 00.00-den kúshine enedi.
