SQO-da bir jyl buryn elevatordan 170 mln teńgeni qoldy etken kúdikti ustaldy
PETROPAVL. QazAqparat – Soltústik Qazaqstan oblysynda elevatorǵa qaraqshylyq shabýyl jasap, 170 mln teńgeni urlaǵan kúdikti bir jyldan keıin ustaldy, dep habarlaıdy QazAqparat tilshisi.
Esterińizge salaıyq, qaraqshylyq shabýyl byltyr qarasha aıynda Aqjar aýdanynda boldy. «Talshyq Astyq LTD» JShS ǵımaratyna maska kıgen 4 adam basyp kirip, sholaq myltyqqa uqsas qarýmen qorqytyp, 170 mln teńgeni alyp ketken.
SQO polıtsııa departamenti baspasóz qyzmetiniń málimetinshe, kúdiktilerdiń bireýi bir jyldam astam ýaqyt izdeýde boldy. 10 jeltoqsan SQO PD Krımınaldyq polıtsııa basqarmasy qyzmetkerleriniń astanaǵa qyzmettik issapary barysynda onyń izine túsip, ustady. Qazirgi ýaqytta Kókshetaýdyń 33 jastaǵy turǵyny Nur-Sultan qalasynyń ýaqytsha ustaý ızolıatorynda otyr. Bul shabýyl jasaǵan toptaǵy ekinshi kúdikti, birinshisi qańtarda qolǵa túsken bolatyn. Polıtseıler qazir qalǵandarynyń júrgen jerin anyqtaý maqsatynda jumys júrgizip jatyr.
«Qylmyskerlerdi izdeý – krımınaldyq polıtsııa bólinisteri jumystarynyń mańyzdy baǵyttarynyń biri. Keıde sot tóreliginen qashyp júrgenderdi izdeýge kóp ýaqyt ketedi. SQO-da jyl basynan 47 qylmyskerge izdeý jarııalandy. Búginde olardyń 35-i ustaldy, úsheýi qaraqshylyq shabýyl, ekeýi aýyr dene jaraqattaryn keltirgeni, bireýi tonaý, taǵy bireýi esirtki qylmysyn jasaǵany úshin izdeýde boldy.
TMD elderiniń quqyq qorǵaý organdary úshin oblys polıtseıleri 20 qylmyskerdiń júrgen jerin anyqtap berdi. QR tys jerde qylmys jasady degen kúdikpen tórt soltústikqazaqstandyq anyqtaldy», - deıdi SQO PD KPB bastyǵy polıtsııa polkovnıgi Petr Klımov.
