SQO-da bir úıir jylqy eki jol apatyna sebepshi boldy
PETROPAVL. QazAqparat – Soltústik Qazaqstan oblysynda bos júrgen bir úıir jylqy tas jolǵa shyǵyp ketip, saldarynan eki jol-kólik oqıǵasy oryn aldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, eki oqıǵa da Esil aýdanynyń aýmaǵynda túnde bolǵan. 1 qarasha kúni Shal aqyn aýdanynyń 54 jastaǵy turǵyny «Lada Largýs» avtokóligimen jubaıy jáne týysymen Petropavl qalasynan úıine qaıtyp kele jatady. Saǵat 22.00 shamasynda Esil aýdany Birlik aýyly mańyndaǵy Jezqazǵan-Petropavl tas jolynda avtokólik aldyna bir úıir jylqy shyǵa kelgen. Júrgizýshiniń aıtýynsha, soqtyǵyspaý múmkin bolmady. Adamdar din aman, soqqy alǵan janýar ólip qaldy. Avtokólikke zaqym kelgenimen, saparyn jalǵastyrdy.
Polıtseıler baqtashysyz júrgen jylqyny izdeýge kirisken kezde, jaqyn mańda ekinshi jol-kólik oqıǵasy boldy. 32 jastaǵy petropavldyq sol joldyń boıynda «Lada Prıora» avtokóligimen Ǵ. Músirepov aýdanynyń Novoıshımskoe aýylyna qaraı kele jatyp, aldynan shyǵa kelgen jylqyny janamalaı soǵyp ketken. Júrgizýshi men 29 jastaǵy jolaýshy zardap shekken joq, al janýar qashyp ketti. Kólikke mehanıkalyq zaqym keldi.
Tártip saqshylary bos júrgen maldyń ıelerin tapty.
Jylqy ıeleri QR Ákimshilik quqyq buzýshylyq týraly kodekstiń «Aýyl sharýashylyǵy janýarlaryn jaıý qaǵıdalaryn, ıtter men mysyqtardy asyraý jáne serýendetý qaǵıdalaryn, qańǵybas ıtter men mysyqtardy aýlaý jáne joıý qaǵıdalaryn buzý» baby boıynsha jaýapkershilikke tartylady.
«Jyl basynan osymen tórtinshi ret qańǵybas maldar jol-kólik oqıǵasyna sebepshi boldy. Mal ıeleriniń jaýapsyzdyǵynan adamdar jaraqat alyp, tipti adam ólimine ákelip soǵýy da múmkin. Aýdandyq polıtsııa bóliminiń qyzmetkerleri maldyń bos júrýine jol bermeý úshin túsindirme is-sharalaryn júrgizip turady. Tamyz aıynyń ortasynan, SQO aýmaǵynda mal baǵý qaǵıdasy qoldanysqa engizilgen sátten, maldaryn erkin jaıylymǵa jibergen aýyldyń 40 turǵyny jaýapkershilikke tartyldy», - deıdi Esil aýdanynyń PB bastyǵy Erlik Eslámbekov.
Aıta ketsek, oblysta jyl basynan avtokólikter men janýarlardyń soqtyǵysýynan eki adam jaraqat aldy.
