SQO-da bir úıdiń 2 balasy kólshiktegi sýǵa túsip mert boldy
PETROPAVL. QazAqparat – Soltústik Qazaqstan oblysynda otbasymen demalýǵa barǵan bir úıdiń eki balasy sýǵa ketti, dep habarlaıdy QazAqparat tilshisi.
SQO tótenshe jaǵdaılar departamenti baspasóz qyzmetiniń málimetinshe, 31 mamyr kúni Shal aqyn aýdany Mergen aýylynyń mańyndaǵy qazanshuńqyrda eki bala sýǵa ketti.
Ata-analarynyń aıtýynsha, olar bes balasymen kólshikke saǵat 13.00 shamasynda kelgen. Qastarynda 11 jáne 9 jastaǵy qyz ben uly, 2 jastan asqan jáne bıyl týǵan sábıler, sondaı-aq asyrap alǵan 2012 jyly týǵan bala bolǵan.
Qazanshuńqyrdyń janyna kelisimen otbasy palatka qurǵan. Bir mezet balalardyń áke-sheshesi emshektegi sábımen palatkaǵa kirgen. Úsh jasóspirimniń ekeýi –2009 jylǵy ul bala 2011 jylǵy qyz bala eken.
«Kólshiktiń bir bóligi tereń emes, sý tizeden keledi. Ekinshi bóliginde tereńdigi 3 metrge deıin jetedi. Palatkadan shyqqan er adam jaǵadan eki metrdeı jerde sýda júzip júrgen er balanyń denesin kórgen. Alyp shyǵyp, qyzdy izdeı bastaǵan. Birden aýdandyq polıtsııa bólimshesine, qutqarý qyzmetine habarlasqan. Oqıǵa ornyna balalar oqyǵan mekteptiń dırektory jetken. Qyzdyń denesin ózdikterinen taba almaǵandyqtan Petropavldan qutqarýshy-súńgýirler otrıadyn shaqyrtty, alaıda, jergilikti mamandar men aýyl turǵyndary jasóspirimniń denesin olar kelgenshe eki metr tereńdikten ózderi alyp shyqty», - deıdi SQO TJD bastyǵynyń orynbasary Murat Qanǵojınov.
Balalardyń mert bolýyna ne sebep bolǵany tekseriletin bolady.
«Balalar sýǵa ketken kezde áke-shesheleri palatkada bolǵan. Oqıǵa ornynda bolǵan polıtseıler jasóspirimderdiń denesinen zorlyq belgilerin tapqan joq, degenmen sot-medıtsınalyq saraptamanyń qorytyndysyn kútemiz», - deıdi Murat Qanǵojınov.
Buǵan deıin SQO-ǵa otbasymen dostaryna qonaqqa kelgen jigittiń sýǵa ketkenin aıtqan edik.
