SQO-da bir táýlikte bes mas júrgizýshi ustaldy
PETROPAVL. QazAqparat – Soltústik Qazaqstan oblysynda 27 qańtar kúni bastalǵan «Mas júrgizýshi» operatsııasy aıasynda bir táýlikte 5 mas júrgizýshi ustaldy, dep habarlaıdy QazAqparat tilshisi oblystyq polıtsııa departamenti baspasóz qyzmetine silteme jasap.
Jambyl aýdanynyń 37 jastaǵy turǵyny mingen Chevrolet Niva avtokóligin polıtseıler aýdan ortalyǵy Presnovkada toqtatqan. Júrgizýshiden ishimdiktiń ıisi shyǵyp turǵan. Medıtsınalyq kýálandyrý er adamnyń mas kúıde rólge otyrǵanyn rastady. Júrgizýshige ákimshilik hattama toltyryldy jáne aýdandyq sotqa jiberildi. Ol 15 táýlikke ákimshilik qamaýǵa alynyp, jeti jylǵa júrgizýshi kýáliginen aıyrylýy múmkin.
SQO polıtsııa departamenti jergilikti polıtsııa qyzmeti basqarmasynyń bastyǵy Aıdyn Baımatovtyń aıtýynsha, «Mas júrgizýshi» operatsııasynyń alǵashqy kúninde jol qozǵalysy erejesi 477 ret buzylǵandyǵy anyqtalǵan. Kólik basqarý quqyǵynan aıyrylǵan 24 júrgizýshi, jyldamdyqty asyrǵan - 28 jáne manevr jasaý erejesin buzǵany úshin – 13 júrgizýshi ustaldy. Sondaı-aq qaýipsizdik beldigin paıdalanbaǵany úshin 70 júrgizýshi, rólde telefonmen sóılesken 52 júrgizýshi jaýapqa tartyldy.
«Basty mindet, árıne, jol-kólik oqıǵalarynyń aldyn alý. «Mas júrgizýshi» jedel-profılaktıkalyq is-sharasymen birge qańtardyń 21-i men 31-i aralyǵynda «Qaýipsiz mektep avtobýsy» aktsııasy ótkizilip jatyr. Munda basymdyq oqýshylarǵa beriledi. Balalarǵa jol qozǵalysy erejeleri týraly, joldy kesip ótý, velosıpedpen júrý erejeleri sııaqty áńgime júrgiziledi» - dedi Aıdyn Baımatov.
Jyl basynan SQO joldarynda 30-dan astam mas júrgizýshi ustaldy.
