SQO-da bir táýlikte 9 mas júrgizýshi qolǵa tústi
PETROPAVL. QazAqparat – Soltústik Qazaqstan oblysynda bir táýlikte jolda júrý erejelerin buzýǵa qatysty 356 derek tirkeldi. Sonyń 9-ynda júrgizýshiler kólikke mas kúıde otyrǵan, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, polıtseıler Petropavldaǵy Shýhov pen N.Nazarbaev kósheleriniń qıylysynda saǵat 04:50 shamasynda 35 jastaǵy qala turǵyny júrgizip kele jatqan «Mercedes» avtokóligin toqtatty. Іs-qımyly oǵash kóringen er adam medıtsınalyq tekserýden ótkizildi. Nátıjesinde onyń esirtkige elitken kúıi rýlge otyrǵany anyqtaldy.
Er adam ákimshilik qamaýǵa alynyp, 7 jyl merzimge kólik basqarý quqyǵynan aıyrylady.
Jalpy bir táýlik ishinde oblys joldarynda 9 mas júrgizýshi ustaldy. Qazir óńir polıtseıleri 17 qazanda bastalǵan «Mas júrgizýshi» oblystyq jedel-profılaktıkalyq is-sharasy aıasynda jumys istep jatyr. Quqyq buzýshylyqtardyń aldyn alý maqsatynda joldarda jasaqtardyń sany artyp, tártip saqshylary túndegi patrýldeýdi kúsheıtti.
«Bir táýlikte jol júrisi qaǵıdalaryn buzýdyń 356 deregi anyqtaldy. Kólik júrgizýshileri negizinen qaýipsizdik beldigin taqpaıdy jáne rýlde otyryp telefonmen sóılesedi. Sáıkesinshe 36 jáne 25 júrgizýshi ustaldy. Sondaı-aq manevr jasaý erejelerin buzǵany úshin 15 júrgizýshi jaýapqa tartyldy. Bul jol júrisi qaǵıdalaryn óreskel buzýǵa jatady, jiberilgen qatelik jol qozǵalysyna qatysýshylardyń ómirin qııýy múmkin eken esten shyǵarmaǵan jón», - deıdi SQO PD Jergilikti polıtsııa qyzmeti basqarmasy bastyǵynyń orynbasary Aleksandr Rozbah.
SQO-da 9 aıda jolda júrý erejesin buzýdyń saldarynan 26 jol-kólik oqıǵasy tirkelip, 8 adam qaza tapty, 47 adam jaraqat aldy. Jyldamdyqty asyrǵany úshin 33 avtokólik júrgizýshisi jaýapkershilikke tartyldy. Olar 14 jol-kólik oqıǵasyna sebep bolǵan, saldarynan 1 adam qaza taýyp, 21-i jaraqattandy. 7 júrgizýshi jaıaý júrginshiler ótkelinen ótý erejelerin buzdy. Bul 13 jol-kólik oqıǵasyna ákelip, saldarynan 1 adam qaza tapty, 13 adam jaraqattandy.
