SQO-da bir táýlikte 14 mas júrgizýshi ustaldy
PETROPAVL. QazAqparat – Soltústik Qazaqstan oblysynda bir táýlikte ǵana kólikti mas kúıde basqarǵan 14 júrgizýshi anyqtaldy, endi olar 7 jylǵa kólik júrgizý quqyǵynan aıyrylmaq, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, 14 júrgizýshi buǵan deıin kólikti basqarý quqyǵynan aıyrylsa da rólge mas kúıde otyrǵan. Ákimshilik quqyqbuzýshylyqqa jol bergen olar endi 50 AEK mólsherinde aıyppul tóleıdi nemese 10 kúnge qamalady. Sondaı-aq 7 jylǵa kólik basqarý quqyǵynan aıyrylady.
Qazir SQO-da «Qaýipsiz jol» jedel-profılaktıkalyq is-sharasy ótip jatyr. Aktsııanyń maqsaty – jol apatyn azaıtyp, júrgizýshilerdi tártipke salý.
Tártip saqshylarynyń aıtýynsha, jolda júrý erejelerin qatań saqtaý, uqyptylyq tanytý jol-kólik oqıǵalarynyń sanyn azaıtady jáne qaýipsizdikke kepil bolady.
«Qaýipsiz jol» jedel-profılaktıkalyq is-sharasynyń alǵashqy táýliginde oblysta 500-ge jýyq quqyqbuzýshylyq anyqtaldy. Onyń 46-sy jyldamdyqty asyrýǵa, 56-sy rólde telefonmen sóılesýge qatysty. Al 67 adam qaýipsizdik beldigin taqpaǵany úshin jazalandy. Jol erejelerin buzýshylardyń ishinde jaıaý júrginshiler de bar. 75 adam joldy belgilenbegen jerden jáne baǵdarshamnyń qyzyl túsine kesip ótpek bolǵan.
