SQO-da bir saǵat ishinde jylqynyń kesirinen eki jol apaty boldy
PETROPAVL. QazAqparat - SQO-da bir saǵat ishinde jylqylardyń qatysýymen eki jol-kólik oqıǵasy boldy, dep habarlaıdy QazAqparat Polisia.kz-ke silteme jasap.
Esil aýdanynda polıtseıler Korneevka aýylynyń mańynda qaıǵyly jaǵdaıǵa sebep bola jazdaǵan jylqynyń ıesin izdestirýde. Janýar tún ortasynda jol ústinde 42 jastaǵy jergilikti turǵyn júrgizip kele jatqan Audi avtokóligine soqtyǵysqan. Júrgizýshi aman qaldy, jaralanǵan janýar qashyp ketken. Iesi ÁQBtK-niń 408-baby boıynsha erkin jaıylymǵa jol bergeni úshin aıyppul tóleýi múmkin.
Jarty saǵattan keıin, 3 qazan saǵat 00:30 shamasynda oblystyń basqa bóliginde tabynnan bólinip ketken jylqy Lexus avtomashınasynyń astyna túsken. Jol-kólik oqıǵasy Aqqaıyń aýdanynda oryn aldy. Júrgizýshi men onyń áıeli zardap shekken joq, janýar sol jerde mert boldy. Baqtashyǵa qatysty ákimshilik hattama toltyryldy, jaza – 3 aılyq eseptik kórsetkish mólsherindegi aıyppul.
«Erkin jaıylymnyń árbir faktisi qaıǵyly jaǵdaıǵa ákep soǵýy múmkin. Qyrkúıek aıynda bundaı oqıǵalar Taıynsha jáne Aqjar aýdandarynda da boldy. Jergilikti polıtsııa qyzmetiniń mamandary aýyl turǵyndaryna túsindirý jumystaryn júrgizýde. Kún saıyn erkin jaıylym faktileri anyqtalady. Oblysta qańǵybas maldy qamaýǵa arnalǵan 230 qora bar. Olarda bıyldyqqa 9766 bas mal qamalyp, 3480-iniń ıesine aıyppul salyndy», – deıdi SQO PD Jergilikti polıtsııa qyzmeti basqarmasynyń bastyǵy Aıdyn Baımatov.
9 aıdyń ishinde SQO joldarynda janýarlarmen soqtyǵysýdyń 24 deregi tirkeldi. Polıtseıler aýyl turǵyndarynan maldy qaraýsyz qaldyrmaýdy suraıdy.
