SQO-da bir rettik zańdastyrýdan 7 myńnan astam kólik ótpek
SQO polıtsııa departamenti baspasóz qyzmetiniń málimetinshe, Petropavlda shetelde tirkelgen avtomobılderdi zańdastyrý Nefteprovodnaıa kóshesi, 7 mekenjaıynda ornalasqan Mamandandyrylǵan halyqqa qyzmet kórsetý ortalyǵynda júrgizilip jatyr. Munda túske deıin 35 adam kelip ótinish bildirdi. Onyń 10-ynyń qujattary qaralyp, beseýi jańa qazaqstandyq nómirlermen ketti.
Alǵashqylardyń biri bolyp «Daewoo Matis» avtokóligin petropavldyq Dmıtrıı Savıch tirkedi.
«Men barlyq kezeńderden óte tez óttim. Eń bastysy, mashınamda kemshilikter bolmaǵany qýantty. Ony satyp almas buryn urlanbaǵanyna, esh jerde kepilde turmaǵanyna, qujattarynyń durys bolýyna kóz jetkizdim», - deıdi Dmıtrıı.
Mamandandyrylǵan HQKO qyzmetkerleri atap ótkendeı, tirkeý týraly ótinimdi kez kelgen halyqqa qyzmet kórsetý ortalyǵynda nemese e-gov arqyly berýge bolady. Budan bólek, «elektrondyq úkimettiń» saıtynda jabyq boksta teksertý úshin aldyn ala kezek brondaýǵa bolady. Onda krımınalıster agregattyq nómirlerdi kólik quralyn tirkeý týraly kýáligindegi málimettermen salystyrady, avtokólikti krımınaldyq esepter boıynsha tekseredi. Eger mashına talaptarǵa saı bolsa (shetelde esepten shyǵarylǵan, kedendik tazartýdan ótken jáne t.b.), kólik ıesi ony tirkep, qazaqstandyq nómir alady.
«Keremet qarbalas joq. Aldyn ala belsendi túsindirý jumystary júrgizildi. Qyzmetkerler jurtshylyqpen kezdesip, BAQ jáne áleýmettik jeliler arqyly adamdardyń suraqtaryna jaýap berdi. Barlyq suraqtar boıynsha t.me/petropavloskbanderos Telegram-chatynda keńes alýǵa bolady, sondaı-aq, jumys ýaqytynda SQO PD protsessıngtik ortalyǵyna 8 (7152) 32-00-19, 32-00-22 telefondary arqyly habarlasýǵa bolady», - deıdi SQO PD ákimshilik polıtsııa basqarmasynyń bastyǵy Serik Áljanov.
Polıtseılerdiń esebinshe, SQO-da sheteldik tirkeýdegi barlyǵy 7 myńnan astam avtomobıl bar. Reseımen kórshi ornalasqandyqtan onyń 90% reseılik nómirmen júrgen kólikter.
Foto: SQO PD baspasóz qyzmeti
