SQO-da bir otbasynyń músheleri ıis tıip, aýrýhanaǵa tústi

PETROPAVL. QazAqparat – Soltústik Qazaqstan oblysy Esil aýdanynda bir otbasynyń 3 adamy ıis tıip, aýrýhanaǵa tústi, onyń bireýi - jastan endi asqan sábı, dep habarlaıdy QazAqparat tilshisi.

SQO Tótenshe jaǵdaılar departamenti baspasóz qyzmetiniń málimetinshe, 2 aqpan kúni saǵat 04.15-te Esil aýdandyq aýrýhanasyna ıAvlenka aýylynyń turǵyndary – 25 jastaǵy er adam, onyń 34 jastaǵy áıeli jáne bir jastan endi asqan qyzdarymen kelgen. Olarda ıis tıip, ýlaný belgileri bolǵan.

Qazir zardap shekkender aýdandyq aýrýhanada em alyp jatyr, jaǵdaıy birqalypty.

Úı ıesiniń pesh murjasyn erte jaýyp tastaǵany anyqtaldy. Saldarynan otbasy músheleri kómirqyshqyl gazyna ýlanyp qalǵan.

Aýyl turǵyny qaýipsizdik sharalaryn saqtamaǵany úshin ákimshilik jaýapkershilikke tartyldy, endi aıyppul tólemek.

Birer kún buryn osyǵan uqsas oqıǵa Ýálıhanov aýdanynda boldy. Aýdandyq aýrýhanaǵa ýlaný belgilerimen 33 jastaǵy áıel jáne onyń 8 jasar balasy túsken. Olar aýdan ortalyǵy – Kishkenekól eldi mekeniniń turǵyndary. Birden aýrýhanaǵa jatqyzylyp, tıisti em-dom jasaldy, qazir jaǵdaılary jaqsy.

Mamandar turǵyn úıdi tekserý kezinde peshtiń tútin joly kúlge bitelip qalǵanyn anyqtady. Sodan pesh durys janbaı, ýly gaz úı ishine taraǵan.

Bul fakti boıynsha da úı ıesine ákimshilik jaza qoldanyldy.

Jalpy byltyr SQO-da 28 adam ıis tıip, ýlansa, bıyl jyl basynan 17 adam zardap shekti, bireýi qaıtys boldy.