SQO-da bir kúnniń ishinde 6 ınternet-alaıaqtyq tirkeldi

PETROPAVL. QazAqparat – Soltústik Qazaqstan oblysynda bir kúnde 6 adam ınternet-alaıaqtardan zardap shegip, jıǵan-tergen aqshasynan aıyryldy, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, 20 sáýir kúni ınternet-alaıaqtyqqa qatysty 6 qylmys tirkeldi. Eki jaǵdaıda qylmyskerler «banktiń qaýipsizdik qyzmetinen qońyraý shalǵan». Qurbandaryn bank shottarynda kúmándi áreketter jasaldy dep qorqytyp, aqshany saqtap qalý úshin basqa shotty ashý qajettigi týraly aıtqan. Jábirlenýshiler óz aqshalaryn nemese alaıaqtardyń nusqaýymen alynǵan nesıeni atalǵan shotqa aýdarǵan , kelip túsken sms-habarlamalardan qupııasózder men kodtardy aıtyp, barlyq qarjydan aıyrylyp qalǵan.

Taǵy bir fakti taýar men qyzmetterge aldyn ala tólem jasaýmen baılanysty.

Al Petropavldyń 38 jastaǵy turǵyny «Telegram» messendjerindegi arnalardy qarap otyryp, «aqshany kóbeıtip beremin» degen qyzmetke tap bolady. Er adam qaskóılermen hat almasyp, olarǵa 9 myń reseılik rýbl jiberedi. Birneshe kúnnen keıin onyń qarjysy 15 myń rýblge jetkeni týraly habarlama kelgen. Alaıda, hat almasý kezinde qaskúnem aqshany alý úshin taǵy aqsha jiberýdi suraǵan. Ońaı oljaǵa qyzyqqan turǵyn qylmyskerge 17 myń rýbl jiberedi. Budan keıin baılanys úzilgen.

Alaıaqtyń qurbanyna aınalǵanyn túsingen er adam polıtsııaǵa júgindi. Keltirilgen shyǵyn - 157 myń teńgeni qurady. Atalǵan fakti «Alaıaqtyq» baby boıynsha Sotqa deıingi tergep-tekserýdiń biryńǵaı tizilimine engizildi.

«21 sáýir kúni krımınaldyq polıtsııa basqarmasynyń qyzmetkerleri volonterlermen birge oblys ortalyǵynyń kóshelerine shyǵyp, ınternet-alaıaqtyqtyń qaýpi týraly aldyn alý jumysyn júrgizdi. Bir kúnniń ishinde adamdar kóp júretin oryndarda, ıaǵnı qala ortalyǵyndaǵy, 20 yqsham aýdandaǵy, Bereke yqsha maýdanyndaǵy saýda úıleriniń qasynda 600 jadynama taratyldy. «Banktiń qaýipsizdik qyzmetinen» qońyraý shalynatyn bolsa, eń durysy, tutqany qoıý. Alaıaqtar adamdardy óz yrqyna kóndire alady, olarmen áńgimelesip, táýekelge barmaǵan jón. Eger shotqa qatysty kúmán týyndasa, jaqyn mańdaǵy bank bólimshesine barýǵa bolady», - deıdi SQO Polıtsııa departamenti krımınaldyq polıtsııa basqarmasynyń aǵa jedel ýákili Andreı Akopıan.