SQO-da bir kúnde mas kúıinshe kólik tizgindegen 14 júrgizýshi ustaldy
PETROPAVL. QazAqparat – Soltústik Qazaqstan oblysynda «Qaýipsiz jol» jedel-profılaktıkalyq is-sharasy aıasynda polıtsııa ekıpajdarynyń sany kóbeıtilip, nátıjesinde jolda júrý erejesin óreskel buzýshylar jazalanyp jatyr, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, «Qaýipsiz jol» jedel-profılaktıkalyq is-sharasynyń alǵashqy kúni oblys joldarynda 500-den asa quqyq buzýshylyq anyqtaldy.
«Іs-sharany uıymdastyrýdaǵy maqsat - joldardaǵy tártipti nyǵaıtýǵa baǵyttalǵan. Bul óz kezeginde jol qozǵalysy qaýipsizdigine septigin tıgizedi. Kóbine jol qozǵalysy erejesine mán bermeıtin kólik júrgizýshileri men júrginshiler arasynda profılaktıkalyq jumystar kúsheıtildi», - deıdi SQO PD bastyǵynyń birinshi orynbasary Qanat Aıtbaev.
Bul kúnderi quqyqtyq tártipti qamtamasyz etýge aýdandyq, oblystyq jáne respýblıkalyq mańyzy bar joldarda, sondaı-aq eldi mekenderde qyzmet atqaratyn 119 avtopatrýl jumyldyryldy. Jyldamdyq rejımin arttyrǵany úshin bir kúnniń ishinde 70 júrgizýshi jazaǵa tartyldy.
Mas kúıinde rólge otyrǵan 14 adam anyqtaldy. 7 avtomobıl júrgizýshisi kólik quralyn basqarý quqyǵynan aırylǵanymen rólde bolǵan. Qaýipsizdik belbeýin taqpaǵan 81 júrgizýshige hattama toltyryldy. Aıyp turaǵyna 5 avtokólik qoıyldy.
Joldaǵy tártipsizdigi úshin jaıaý júrginshiler de jazalandy. SQO-da bir kúnniń ishinde belgilenbegen jerden joldy kesip ótýdiń 84 deregi tirkeldi.
