SQO-da bir kúnde qoǵamdyq oryndardan 113 mas adam anyqtaldy
PETROPAVL. QazAqparat – Soltústik Qazaqstan oblysynda polıtseılerdiń «STOP ishimdik» sharasy aıasynda bir kúnde qoǵamdyq oryndarda mas júrgen 113 adam anyqtaldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, «STOP ishimdik» oblystyq jedel-profılaktıkalyq is-sharasynyń maqsaty – mas kúıde jasalatyn qylmys pen quqyq buzýshylyqtyń aldyn alý.
Petropavlda «Severnyı» yqsham aýdanyndaǵy azyq-túlik dúkeniniń birinde saǵat 21.00-den keıin ishimdik satylǵan. Kásipkerge jaqyn mańda №8 ýchaskelik polıtsııa pýnktiniń ornalasýy da kedergi bolmaǵan. Tekserý nátıjesinde dúkenniń spırt ishimdigin satýǵa lıtsenzııasy joq bolyp shyqty. Jeke kásipkerge «Tıisti tirkeýsiz, ruqsatsyz nemese habarlama jibermeı kásipkerlik nemese ózge de qyzmetpen aınalysý, sondaı-aq áreketterdi (operatsııalardy) júzege asyrý» baby boıynsha materıal jınaldy. Dúkennen 172 lıtr alkogol tárkilendi.
«Alkogol saýdasynda zańnamamen bekitilgen ereje bar, ol adamdardyń qaýipsizdigin qamtamasyz etýge baǵyttalǵan. Lıtsenzııa alkogoldiń resmı óndirýshiden satyp alynǵanyn rastasa, dúken taýardyń tıisti saqtalýyn qamtamasyz etedi. Qoǵamdyq oryndarda spırt ishimdigin ishý jáne mas kúıde júrý kóp jaǵdaıda buzaqylyq jasalýyna alyp keledi. Spırt ishimdikti túnde satýǵa tyıym salý - otbasy-turmystyq janjaldy, aýyr qylmysty boldyrmaýǵa septigin tıgizedi. Jyl basynan SQO-da mas kúıde 701 qylmys jasalǵan – bul ótken jylmen salystyrǵanda, 5 paıyzǵa tómen», - dedi oblystyq polıtsııa departamenti bastyǵynyń birinshi orynbasary Qanat Aıtbaev.
Іs-sharanyń alǵashqy kúninde polıtseıler 160 quqyq buzýshylyqty anyqtady, onyń 113-i qoǵamdyq oryndarda mas kúıde júrý. Sondaı-aq, tártip saqshylary operatsııa aıasynda «Maskúnem» sanaty boıynsha esepte turǵan tulǵalardy turǵylyqty jeri boıynsha tekseredi. SQO-da atalǵan sanat boıynsha esepte 2 658 adam tur.
