SQO-da bir aıda 27 adam rýlge mas kúıde otyrǵan

PETROPAVL. QazAqparat – Soltústik Qazaqstan oblysynda «Qaýipsiz jol» aldyn alý is-sharasynyń aıasynda bir aıda kólikti mas kúıde júrgizgen 27 adam ustaldy, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, polıtseıler tańerteń Petropavl kóshelerin patrýldeý kezinde Abaı kóshesiniń boıynda «Lada-2170» avtokóligin tekserý úshin toqtatqan. Rýlde oblys ortalyǵynyń 30 jastaǵy turǵyny bolǵan. Sondaı-aq salonda tórt jolaýshy otyrǵan. Barlyǵynan alkogoldiń ıisi shyǵyp turǵan.

Medıtsınalyq kýálandyrý júrgizýshiniń spırttik ishimdik ishkenin kórsetti. Osylaısha ol óziniń ǵana emes, barlyq tanystarynyń ómiri men densaýlyǵyna qaýip tóndirgen.

QR Ákimshilik quqyq buzýshylyq kodeksiniń 608-baby boıynsha ákimshilik materıal jınaldy. Qazirgi ýaqytta er adam ákimshilik qamaqqa alyndy, sondaı-aq 7 jylǵa kólik basqarý quqyǵynan aıyryldy.

«19 shildede bastalǵan reıd barysynda oblysta barlyǵy 27 júrgizýshi mas kúıde ustaldy. Bul jolda júrý erejesin óreskel buzý bolyp esepteledi. Spırttik ishimdik iship rýlge otyratyn keıbir júrgizýshilerdiń ózine degen senimdiligi qaıǵyly jaǵdaıǵa ákelýi múmkin. Barlyq kólik júrgizýshilerin jol júrisi erejesin qatań saqtaýǵa shaqyramyz», - deıdi Petropavl qalalyq polıtsııa basqarmasy jergilikti polıtsııa qyzmetiniń bólim bastyǵy Rýstam Sadýlov.