SQO-da bir aı buryn joǵalǵan er adamnyń denesi tabyldy
Petropavl turǵyny ıÝrıı Volosnıkov 24 qyrkúıekte úıinen habarsyz ketip, bir aıǵa jýyq izdeýde boldy. 61 jastaǵy er adamdy tabý úshin polıtseılerge volonterler men eriktiler kómekke keldi. Qutqarýshylar joǵalǵan adam bolýy múmkin aımaqty sharlap ótti. Alynǵan aqparatqa sáıkes, qala turǵyny Esil ózenindegi avtokólik kópirin kesip ótýi múmkin. Sondyqtan ózen jaǵasy men túbi qaraldy, saıajaı massıvi muqııat tekserildi.
Volosnıkovtyń denesi 19 qazan kúni tabyldy. Ol ózine qol jumsaǵan eken.
SQO polıtsııa departamenti osy oqıǵaǵa qatysty túsinik berdi.
«19 qazanda eski sorǵy stantsııasy aýdanynda asýly kúıdegi ózin-ózi óltirý belgilerimen er adamnyń denesi tabyldy. Atalǵan fakti QR Qylmystyq kodeksiniń 105-baby «Ózin-ózi óltirýge deıin jetkizý» boıynsha Sotqa deıingi tergep-tekserýlerdiń biryńǵaı tizilimine engizildi. Bolǵan oqıǵanyń barlyq mán-jaıyn muqııat jáne obektıvti qaraýǵa baǵyttalǵan tergeý áreketteri júrgizilip jatyr», - delingen baspasóz habarlamasynda.
