SQO-da bir aptada 27 mas júrgizýshi ustaldy

PETROPAVL. QazAqparat – Soltústik Qazaqstan oblysynyń joldarynda bir aptada 27 mas júrgizýshi ustaldy, dep habarlaıdy QazAqparat tilshisi.

SQO Polıtsııa departamenti baspasóz qyzmetiniń málimetinshe, 21 – 27 qarasha aralyǵynda óńirde «Qaýipsiz jol» jedel-profılaktıkalyq is-sharasy ótti. Bir apta boıy kún saıyn 400-den astam polıtsııa qyzmetkeri jol qaýipsizdigin qamtamasyz etýge jumyldyryldy.

Petropavl syrtyndaǵy aınalma jolda toqtatylǵan «Mitsubishi» avtokóliginiń 47 jastaǵy júrgizýshisi 15 táýlikke ákimshilik qamaýǵa alynyp, 7 jylǵa kólik basqarý quqyǵynan aıyryldy. Polıtsııa qyzmetkerlerimen sóıleskende ol shaıqalaqtap bir orynda tura almaǵan. Medıtsınalyq kýálandyrý er adamnyń mas ekenin kórsetti.
«Іs-shara ótken ýaqytta kólikti mas kúıde júrgizgen 27 júrgizýshi anyqtaldy. Esterińizge sala keteıik, jyl basynan oblysta mas júrgizýshilerdiń kinásinen 6 adam qaza taýyp, 23 adam jaraqattandy. Budan bólek, jedel-profılaktıkalyq is-shara barysynda jyldamdyqty asyrýdyń – 174 , baǵdarshamnyń tyıym salynǵan túsine ótýdiń – 18, apatty jaǵdaı jasaýdyń – 15 deregi anyqtaldy. Osy buzýshylyqtardyń árqaısysy aýyr zardaptarmen bolatyn jol-kólik oqıǵalaryna sebep bolýy múmkin. Eń jıi kezdesetini – jaıaý júrginshilerdiń joldyń ruqsat etilmegen jerinen ótýi, mundaı 345 derek tirkeldi», - deıdi SQO PD jergilikti polıtsııa qyzmeti basqarmasynyń bastyǵy Aıdyn Baımatov.
Jalpy SQO-da bir aptada barlyǵy 3 myńnan astam túrli quqyq buzýshylyqtar anyqtaldy.