SQO-da bir aptada 26 armenııalyq avtokólik tirkeldi
NUR-SULTAN. QazAqparat - Soltústik Qazaqstan oblysynda alty kúnde armenııalyq 26 avtokólik tirkeldi, dep habarlaıdy Polisia.kz.
2020 jylǵy 1 aqpanǵa deıin Armenııadan ákelingen avtokólikterdi tirkeý demalys kúnderi de jalǵasyp jatyr. Alty kúnde Soltústik Qazaqstan oblysynda 26 temir tulpar respýblıkaǵa tirkeýge qoıyldy.
Senbi jáne jeksenbi kúnderi Mamandandyrylǵan halyqqa qyzmet kórsetý ortalyǵynda oblystyq Polıtsııa departamentiniń qyzmetkerleri armenııalyq kólikterin tirkeýge qoıǵaly júrgen azamattarǵa keńesterin berip, tirkeý jumystaryn júrgizedi.
SQO PD Ákimshilik polıtsııa basqarmasynyń bastyǵy Jasulan Ospanovtyń aıtýynsha, kólikterin tirkeýge kelgen azamattardyń kópshiligi – petropavldyqtar, al segiz adam oblys aýdandarynan kelipti.
Senbi kúni Aqjar aýdanynyń turǵyny demalys kúnin paıdalanyp, kóligin tirketý úshin oblys ortalyǵyna kelipti. Erbolat Baltın 2008 jyly jasap shyǵarylǵan «Toyota Camry» avtokóligin ótken jyldyń kúzinde aıdap ákelgen. – Bul jaǵdaı úshin biraz alańdaýǵa týra keldi. Másele sheshilip, jeńildikter jasaldy. Endi óz kóligimmen erkin júre alamyn, – deıdi kólik ıesi.
Esterińizge sala keteıik, Armenııalyq kólikterdi tizgindep júrgen qazaqstandyqtar 2020 jylǵy 1 maýsym men 30 qyrkúıek aralyǵynda sheteldik kólikterin tirkeı alady.
Soltústik Qazaqstan oblysynyń Polıtsııa departamentinde shuǵyl jeli telefondary jumys isteıdi (32-00-19, 32-00-22, 8-776-297-84-32). Turǵyndar kólikti tireýge baılanysty suraqtarymen osy nómirler boıynsha keńes ala alady.
«2020 jylǵy 1 aqpanǵa deıin Qazaqstanǵa engizilgen, basqarý róli sol jaqta ornalasqan jáne Armenııada bizdiń eldiń azamattaryna tirkelgen avtokólikter tirkeýge qoıylady. Resimdeý quny 11 946 teńgeni quraıdy. Buǵan tirkeý úshin tólem, kólik quralynyń tirkelý kýáligi men memlekettik tirkeý nómiri úshin memlekettik baj salyǵy kiredi», – dedi Jasulan Ospanov.
