SQO-da bir apta buryn joǵalǵan jasóspirimniń denesi kólden tabyldy
PETROPAVL. QazAqparat - Soltústik Qazaqstan oblysy Taıynsha aýdanynda 27 mamyrda iz-túzsiz joǵalǵan jasóspirimniń denesi Shaǵalaly kólinen tabyldy, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń habarlaýynsha, 15 jastaǵy jasóspirim 27 mamyr kúni úıinen shyǵyp ketip, qaıta oralmaǵan. Bala aqyl-oıy kemis dıagnozymen aýrýhanada esepte turǵan eken. Onyń denesi búgin tańerteń saǵat 10:00-dar shamasynda Shaǵalaly kólinen tabyldy.
«Balyq aýlaýǵa barǵan balyqshy osy balanyń denesin taýyp, tıisti organdarǵa habar bergen. Jasóspirimniń denesinen eshqandaı zorlyq belgileri baıqalǵan joq», - deıdi TJD Azamattyq qorǵanys bóliminiń aǵa ınspektor Qýat Mahmetov.
Mamandardyń aıtýynsha, sýǵa shomylý maýsymy bastalǵaly óńirde osymen tórtinshi adam qaza tapty. 1 maýsymda Aıyrtaý aýdany Shalqar kóline balyq aýlaýǵa barǵan 65 jáne 46 jastaǵy 2 adam «Nıva» avtokóligimen birge sýǵa ketip, baqılyq bolǵan. Taǵy bir 65 jastaǵy balyqshy Qyzyljar aýdany Glýbokoe kóline batyp ketti.
«Kóp jaǵdaıda ruqsat etilmegen jerlerde sýǵa shomylý, mas kúıde sýǵa túsý nemese balalardy sý jaǵasynda qaraýsyz qaldyrý qaıǵyly aıaqtalady. Sondaı-aq balyqshylar qarapaıym qaýipsizdik erejelerin saqtamaıdy. Sońǵy bes jylda biz 100-den astam adamdy qutqardyq», - deıdi TJD jedel-qutqarý otrıady jetekshisiniń orynbasary Vıktor Derjanskıı.
Jalpy, sońǵy 5 jylda 168 adam sýǵa ketse, onyń 22-si balalar.
