SQO-da bıoetanol óndirisi qolǵa alynady

ASTANA. QazAqparat - Kelesi jyly Soltústik Qazaqstan oblysynda bıoetanol óndirile bastaıdy. Bul týraly búgin Ortalyq kommýnıkatsııalar qyzmetindegi baspasóz máslıhatynda Soltústik Qazaqstan oblysynyń ákimi Qumar Aqsaqalov aıtty, dep habarlaıdy QazAqparat tilshisi.

«Oblystyń ónerkásip kásiporyndary on aıdyń ishinde 199,8 mlrd teńgeniń ónimin óndirip, 0,7 paıyz ósim kórsetti. Osy aralyqta negizgi kapıtalǵa salynǵan ınvestıtsııa kólemi 146 mlrd teńge boldy. Jyldyń qorytyndysy boıynsha 218 mlrd teńgege jetedi dep kútip otyrmyz. Nazar aýdartýdy jón kórip otyrǵan taǵy bir kórsetkish - eksport pen ımport. 9 aıdyń qorytyndysynda Soltústik Qazaqstanda óndiriletin ónim eksportynyń ósimi 19,6 paıyzdy qurap, al 10 aı boıynsha ımport 10,2 paıyzǵa qysqardy»,-  dedi Qumar Aqsaqalov.

Sonymen qatar, ol óńirde júzege asyrylǵan birqatar iri jobalarǵa da toqtaldy.

«Qazan aıynda bıdaıdy tereń óńdeıtin «BıoOpereıshen»  zaýyty qaıta iske qosyldy. Zaýyt 8 jyl boıy turyp qalǵan bolatyn. Investıtsııa kólemi shamamen 12 mlrd teńgeni qurady. Búgingi kúni krahmal men jelimtik óndirisi bastaldy.  Buǵan deıin krahmal men jelimtik negizinen ımporttalyp kelgen bolatyn. Endi ony ózimiz óndiremiz jáne onyń bir bóligin eksportqa shyǵarý jaıyn qarastyrýdamyz. Sonymen qatar, atalǵan zaýytty jańǵyrtý jumystary júrgizilip jatyr. Kelesi jyldan bastap bıoetanol óndiremiz», - dedi oblys basshysy.