SQO-da byltyr joǵary tehnologııalyq ota 42 syrqatqa tegin jasaldy
PETROPAVL. KAZINFORM – Soltústik Qazaqstan oblysynda bıyl joǵary tehnologııalyq qymbat otany syrqattarǵa tegin jasaý úshin 361 mln teńgege jýyq qarajat bólingen.
«Áleýmettik medıtsınalyq saqtandyrý qory» KEAQ SQO boıynsha fılıalynyń medıtsınalyq kómektiń sapasyn baǵalaý jáne sharttyq mindettemelerdi monıtorıngileý bóliminiń basshysy Olga Polıanskaıanyń aıtýynsha, ómir úshin asa mańyzdy qymbat otaǵa bıylǵa bólingen qarajattyń 207,7 mln teńgesi mindetti áleýmettik medıtsınalyq saqtandyrý arqyly berilip otyr.
«MÁMS júıesinde joǵary tehnologııalyq emdeý ádisteriniń tizbesiniń jáne kóleminiń ulǵaıýynyń arqasynda ólim-jitimniń, onyń ishinde júrek-qan tamyrlary jáne nevrologııalyq aýrýlardan bolatyn ólim-jitimniń tómendeýi baıqalady.
SQO kópsalaly aýrýhananyń kardıologııalyq ortalyǵynyń júrek-qantamyr hırýrgııasy bólimshesi 30 orynǵa shaqtalǵan. Munda kardıohırýrgtar, qan-tamyr hırýrgtary, sondaı-aq ınterventsııalyq kardıologtar men rentgen hırýrgtar jumys isteıdi. Bólimshe mamandary júrekke ashyq operatsııa jasaıdy, mysaly: aortokoronarlyq jáne mammar-koronarlyq shýnttaý, júrek qaqpashalaryn protezdeý jáne plastıkasyn, sol jaq qarynshanyń plastıkasyn isteıdi.
Tek qan-tamyr hırýrgtary ǵana otanyń 100-ge jýyq kúrdeli túrin jasaıdy», - deıdi Olga Polıanskaıa.
Byltyr 42 syrqatqa 248,8 mln teńge somasyna joǵary tehnologııaly otalar tegin jasalǵan. Ortasha alǵanda, jasalǵan bir operatsııanyń quny shamamen 6 mln teńge.
«Jıi jasalatyn joǵary tehnologııalyq operatsııalardyń biri - bas jáne moıyn tamyrlarynyń endovaskýlıarlyq embolızatsııasy nemese okklıýzııasy. Medıtsınalyq kómektiń bul túri bıyl qańtarda ǵana SQO-nyń 3 turǵynyna kórsetildi. Olar saqtandyrylmaǵan jaǵdaıda emdelý úshin 6 mln teńgeden astam aqsha tóleıtin edi», - deıdi fılıaldyń bólim basshysy.
Mamannyń aıtýynsha, medıtsınalyq saqtandyrylǵan adam qymbat operatsııany tegin jasatýǵa quqyly.
«Eger adam aýyryp qalsa jáne qymbat tehnologııalardy qoldana otyryp dıagnostıka men emdeýdi qajet etse, onda turǵylyqty jerine qaramastan qajetti medıtsınalyq kómek ala alady. Al qyzmetti alý úshin emdeýge jatý josparly túrde júrgiziledi. Patsıent tirkelgen jeri boıynsha emhanaǵa júginýi qajet, emhana ony aldyn ala konsýltatsııamen jáne qabyldaýshy medıtsınalyq mekemeniń qorytyndysymen emdeýge jatqyzý bıýrosynyń portalynda tirkeıdi. Eger qajetti medıtsınalyq kómekti jergilikti deńgeıde kórsetý múmkin bolmasa, onda komıssııa patsıentti respýblıkalyq deńgeıde emdelýge jiberedi», - deıdi Olga Polıanskaıa.
Buǵan deıin SQO bıyl dári-dármek satyp alýǵa 9,3 mlrd teńge jumsaıtynyn aıtqan edik.
