SQO-da byltyr úsh adam brýtsellez juqtyrdy

PETROPAVL. KAZINFORM – Saryp nemese brýtsellez – adamdar men janýarlardyń júıke júıesi men tirek-qımyl apparatyn zaqymdaıtyn, uzaqqa sozylatyn juqpaly aýrý.

Soltústik Qazaqstan oblysy sanıtarııalyq-epıdemıologııalyq baqylaý departamentiniń málimetinshe, byltyr óńirde alǵash ret jedel brýtsellezdiń 3 jaǵdaıy tirkeldi, onyń ishinde eki adam Shal aqyn aýdanynda, bireýi Qyzyljar aýdanynda juqtyrǵan.

Tirkelgen 3 jaǵdaıdyń úsheýinde de ınfektsııa kózi - iri qara mal, 2 jaǵdaıda naýqastar aýyrǵan maldyń sútin qaınatpaı paıdalanǵan, endi birinde aýrý maldy baǵyp, jeke qorǵanysh quraldaryn qoldanbaǵan.

Mamandardyń aıtýynsha, adam brýtsellezdi aýrý maldy soıý kezinde de juqtyryp alýy múmkin. Ýaqytyly dárigerge qaralyp, emdelmegen jaǵdaıda aýrý sozylmaly túrge ótip, múgedektikke jáne bedeýlikke ákeledi.

Saryp aýrýy dene qyzýynyń 39 - 40°S deıin kóterilýimen bastalady. Naýqas ózin álsiz sezinip, basynyń, býyndarynyń aýyrǵanyna shaǵymdanady. Aýrý shamamen 3 aıǵa sozylady, biraq keıde jyldap aýyratyndar da bar.

Aýrýdyń aldyn alý úshin mindetti túrde jylyna eki ret maldy brýtsellezge tekserip, ınfektsııa anyqtalǵan jaǵdaıda 15 kúnniń ishinde aýrý maldyń kózin joıý qajet. Mal turǵan jer zararsyzdandyrylady, sebebi dezınfektsııalyq preparattar bakterııany túpkilikti joıady.

Tek qaınatylǵan sútti ǵana ishýge bolady. Aýrý qozdyrǵyshy (brýtsella) 100ºS qaınatý temperatýrasynda 5 mınýt ishinde joıylady. Et, sút jáne sút ónimderin zańsyz satý oryndarynan, belgisiz adamdardan satyp alýǵa bolmaıdy.

Mal jaılaǵanda qarapaıym jeke bas gıgıenasyn saqtaý qajet, mal qorada jumys istegennen keıin qoldy mindetti túrde jýý qajet.

Buǵan deıin SQO-da sharýashylyqtan asyl tuqymdy 50 buzaýdy urlaǵan kúdiktiler ustalǵanyn jazǵan edik.