SQO-da byltyr sýda qalyp, shirı bastaǵan 1130 ga aǵashty joıýǵa týra keldi
PETROPAVL. KAZINFORM — Soltústik Qazaqstan oblysynda ormandardy qorǵaý úshin ótken jyly 580 mln teńgege qajetti tehnıka men qondyrǵylar satyp alyndy.
SQO tabıǵı resýrstar jáne tabıǵat paıdalanýdy retteý basqarmasynyń málimetinshe, satyp alynǵan tehnıkanyń ishinde órt sóndirý, patrýldik avtokólikter, aǵash otyrǵyzý mashınalary, ushqyshsyz ushatyn 12 apparat bar.
— Órt qaýipti maýsym barysynda oblys aýmaǵyndaǵy ormandarda orman kúzeti patrýldeıdi, sondaı-aq avtomatty beınemonıtorıngtiń 7 júıesi qoldanylady. Orman kúzeti tabıǵat qorǵaý zańnamasyn buzýdyń 126 deregin 3 mln teńge somasyna ákimshilik aıyppul salyndy. Múddeli organdarmen ózara is-qımyl jospary qabyldandy. Reseılik áriptestermen shekara mańyndaǵy aýmaqtarda birlesip jumys isteý týraly kelisimder jasaldy. Nátıjesinde byltyr orman órtteri tirkelgen joq, — deıdi basqarma basshysy Beıbit Ismanov.
Alaıda, sýda turǵan aǵashtar shirı bastaǵandyqtan olardy kesýge týra kelgen.
— Jer asty sýlarynyń kóterilýi saldarynan ormandardyń shirý jaǵdaılary bar. Mundaıda sharýashylyqtar múmkindiginshe sanıtarlyq is-sharalar júrgizedi. 2024 jyly 1130 gektar aýmaqta shirı bastaǵan aǵashtar kesildi, 113 myń tekshe metr kóleminde otyn daıyndalyp, halyq paıdalanýǵa berildi, — deıdi Beıbit Ismanov.
Jalpy byltyr oblys boıynsha turǵyndarǵa otynǵa jáne aǵash óńdeý tsehtaryna barlyǵy 460 myń tekshe metr aǵash berilgen. Oblystyq bıýdjetke ormandy paıdalaný esebinen 390 mln teńge tústi.
2024 jyly SQO-da 14 orman paıdalanýshysy aǵash daıyndaýmen jáne óńdeýmen aınalysty. Jalǵa alýshylar 200-den astam adamdy jumysqa ornalastyrdy jáne jyl saıyn tsehtarda shamamen 100 myń tekshe metr jergilikti aǵash óńdeledi.
Aǵash daıyndaýdan basqa, memlekettik Qordyń ýchaskeleri rekreatsııalyq maqsatta da beriledi. Oblys aýmaǵynda turǵyndardyń demalysyn uıymdastyrý qyzmetin kórsetý úshin 22 orman paıdalanýshy orman ýchaskelerin jalǵa alǵan.
Buǵan deıin SQO-da qyzyna pyshaq suǵyp alǵan áıeldiń 6 jylǵa sottalǵanyn jazǵan edik.