SQO-da byltyr óndiriste 46 adam zardap shekti
PETROPAVL. KAZINFORM - Soltústik Qazaqstan oblysynda byltyr óndiriste zardap shekkenderdiń sany 21% artqan.
Ulttyq statıstıka bıýrosynyń oblys boıynsha departamentiniń málimetinshe, óndiriste jazataıym oqıǵa kezinde zardap shekken 46 adamnyń beseýi kóz jumdy.
Zardap shekkenderdiń shamamen ár besinshisi - áıel. Mert bolǵandardyń arasynda eki áıel bar.
Ótken jyly óndiristegi jazataıym oqıǵalardyń basym bóligi jekemenshik kásiporyndarda tirkelgen. Atap aıtqanda, zardap shekkenderdiń 61% jeke kásiporyndarda eńbek etken. Al 33% memlekettik uıymdarda, 7% sheteldik zańdy tulǵalardyń kásiporyndarynda jumys istegen.
Salalar boıynsha alǵanda, óndiristik jaraqattardyń kóbi ónerkásip, qurylys, kólik jáne osyǵan uqsas qyzmet túrlerinde tirkelgen. Jalpy zardap shekkenderdiń 63% astamy osy salalardyń jumysshylary. Máselen óńdeý ónerkásibinde 15 adam jaraqat alǵan.
Mamandar óndiristegi jazataıym oqıǵalardyń negizgi sebepterin de atady. Sonyń biri – abaısyzdyq, saldarynan 12 adam jaraqattanǵan. Sonymen qatar eńbek qaýipsizdigi men eńbekti qorǵaý erejelerin buzý saldarynan 10 adam jaraqat alǵan. Tehnologııalyq protsesterdiń buzylýynan – 7, jumys júrgizýdi durys uıymdastyrmaýdan – 4, eńbek jáne óndiristik tártipti saqtamaýdan 4 adam zardap shekti. Budan bólek, jol qozǵalysy erejelerin buzý, jeke qorǵanysh quraldaryn qoldanbaý jáne avarııalyq jaǵdaılar da óndiristegi jaraqattarǵa ákelgen.
Jazataıym oqıǵalardyń ishinde bıiktikten qulaý faktileri jıi kezdesedi. Osyndaı jaǵdaıdan 13 adam zardap shekken. Taǵy 5 adam jol-kólik oqıǵalary kezinde jaraqat alǵan.
Jaraqat túrlerine kelsek, 13 adam jabyq synyq, 11 adam ártúrli dárejedegi termııalyq kúıik alǵan. Ashyq synyqtar men býyn shyǵý sekildi jaraqattar 7 adamda anyqtaldy. Jalpy, 57% - aýyr, 17% - jeńil, qalǵany ortasha jaraqattar sanatyna jatady.
Óndiristegi jazataıym oqıǵalarǵa baılanysty tólengen materıaldyq ótemaqy kólemi de aıtarlyqtaı. 2025 jyly bul maqsatqa jalpy 148 mln teńgege jýyq jumsalǵan. Onyń 136 mln teńgesi eńbekke ýaqytsha jaramsyzdyq paraqtary boıynsha tólense, taǵy 12 mln teńge birjolǵy járdemaqy retinde berilgen.
Buǵan deıin SQO-da astyq býnkerine qulap, mert bolǵan áıelge qatysty sot úkimi shyqqanyn jazǵan edik.
