SQO-da byltyr mas júrgizýshilerdiń kinásinen 6 adam mert boldy
Soltústik Qazaqstan oblysynda ótken jyly mas kúıinde kólik júrgizgen 1164 júrgizýshi anyqtaldy, olardyń 22-si eki ret ustalǵan, dep habarlaıdy Kazinform.
SQO polıtsııa departamenti baspasóz qyzmetiniń málimetinshe, byltyr oblys aýmaǵynda mas júrgizýshilerdiń kinásinen 29 jol-kólik oqıǵasy tirkeldi, sonyń saldarynan 6 adam qaza taýyp, 36 adam jaraqat aldy.
«Kólik quralyn mas kúıde basqarý — jol qozǵalysy erejelerin óreskel buzý bolyp esepteledi. Qazaqstan Respýblıkasy Ákimshilik quqyq buzýshylyq týraly kodeksiniń 608-baby 1-bóliginiń sanktsııasy boıynsha 15 táýlikke ákimshilik qamaýǵa alýǵa jáne 7 jyl merzimge kólik quralyn júrgizý quqyǵynan aıyrý jazasy qarastyrylǵan», — deıdi SQO PD jergilikti polıtsııa qyzmeti basqarmasy bastyǵynyń mindetin atqarýshy Aleksandr Rozbah.
Ótken jyly kólik quralyn júrgizý quqyǵynan aıyrylǵan jáne mas kúıde rýlge otyrýdyń 22 faktisi tirkeldi.
Bul — qylmystyq quqyq buzýshylyq.
Zań buzýshy belgili bir laýazymdardy atqarý quqyǵynan ómir boıy aıyrylyp, bes jylǵa deıingi merzimge bas bostandyǵy shektelýi nemese sol merzimge bas bostandyǵynan aıyrylýy múmkin.
Bıyl jańa jyl merekesinde SQO-da mas kúıinde kólik basqarǵan 5 adam ustaldy.
