SQO-da byltyr kólikpen júk tasymaldaýshylarǵa 92 mln teńgege jýyq aıyppul salyndy
PETROPAVL. KAZINFORM – Soltústik Qazaqstan oblysynda ruqsat etilgen salmaqtyq-gabarıttik parametrlerdi buza otyryp kólikpen júk tasymaldaý faktileri shamamen eki ese artty.
SQO boıynsha kóliktik baqylaý ınspektsııasynyń málimetinshe, byltyr júk tasymaldaýǵa qatysty zańnamany buzǵandarǵa 256 ákimshilik materıal toltyrylǵan. Jalpy somasy 91,85 mln teńge aıyppul salyndy. 2024 jyly 141 fakti tirkelip, 41 mln teńge shamasynda aıyppul salynǵan edi.
— Jalpy alǵanda, avtomobıl kóligi salasyndaǵy zańnamany buzǵany úshin 917 ákimshilik materıal jasalyp, 213,51 mln teńge somasyna aıyppul salyndy. Jolaýshylar men bagajdy tasymaldaýdy baqylaý nátıjesinde 120 avtobýs tekserilip, 11 ákimshilik materıal jasaldy, 305 myń teńge somasyna aıyppul salyndy. Avtobýstar men shaǵyn avtobýstardy mindetti tehnıkalyq baıqaý kezinde jıi anyqtalatyn kemshilik — bilim berý uıymdaryna tıesili kólik quraldarynda «Balalar» aıyrym belgisiniń bolmaýy, — deıdi ınspektsııanyń basshysy Nursultan Jamashov.
Tehnıkalyq baıqaý operatorlaryna qatysty da baqylaý sharalary júrgizildi.
Mindetti tehnıkalyq baıqaýdyń biryńǵaı aqparattyq júıesine derekter durys engizilmegendigi úshin 10 ákimshilik hattama toltyrylyp, 983 myń teńge aıyppul salynǵan.
— Sondaı-aq zańnama talaptaryn buza otyryp berilgen qoldanystaǵy 3607 tehnıkalyq baıqaý dıagnostıkalyq kartasy joıyldy, — deıdi Nursultan Jamashov.
Buǵan deıin Prezıdent júk tasymaldaý úderisin jeńildetýge baǵyttalǵan júıeniń jumysyn synǵa alǵan edi.
