SQO-da byltyr ınternet alaıaqtar turǵyndardyń 1,5 mlrd teńgesin qoldy etti
PETROPAVL. KAZINFORM — Soltústik Qazaqstan oblysynda ınternet alaıaqtyqpen kúresý maqsatynda endi ár aıdyń 15-i kúni halyqtyń qarjylyq saýattylyǵyn arttyrýǵa arnalǵan aýqymdy aktsııa ótedi.
SQO polıtsııa departamentiniń málimetinshe, bıylǵy tórt aı ishinde soltústikqazaqstandyqtar ınternet-alaıaqtardyń kesirinen jarty mlrd teńgesinen aıyryldy. Óńirde kıberqylmystyń aldyn alýdyń jańa tásili engizildi. Endi ár aıdyń 15-i biryńǵaı profılaktıka kúni ótip, polıtseılerge eriktiler, belsendiler jáne barlyq memlekettik organdardyń qyzmetkerleri qosylyp, túsindirý jumysyn júrgizedi. Mamandar aldymen eńbek ujymdaryn aralaıdy.
Qazirgi ýaqytta keń taralǵan alaıaqtyq tásilder:
— densaýlyq saqtaý mekemesi atynan qońyraý shalý («Siz skrınıngten ótýińiz kerek, sms arqyly kelgen kezek nómirin aıtyńyz» jáne t. b.);
— kommýnaldyq qyzmet uıymdary atynan («Eseptegishińizdi tekserý merzimi keldi, sms-kodty aıtyńyz» jáne t. b.);
— jetkizý qyzmetteri atynan («Sizdiń atyńyzǵa sálemdeme / aqsha aýdarymy / habarlama keldi, sms-tegi tórt tańbaly kodty habarlańyz» jáne t. b.);
— uıaly baılanys operatorlary atynan («SIM-kartańyzdyń merzimi aıaqtalýǵa jaqyn, ári qaraı paıdalaný úshin sms-kodty aıtyńyz»).
Polıtseılerdiń aıtýynsha, 2024 jyly SQO-da 756 ınternet alaıaqtyq tirkeldi. Keltirilgen shyǵyn kólemi 942 mln teńge shamasynda, sonyń tek 75 mln teńgesi ǵana qaıtarylǵan.
2025 jyly 654 kıberalaıaqtyq faktisi tirkeldi. Shyǵyn mólsheri 1,5 mlrd teńgege jetti. Alaıda onyń 0,5 mlrd teńgesin qaıtarý múmkin bolǵan.
Buǵan deıin Qazaqstanda ınternet alaıaqtyqtan keletin shyǵyn 20 mlrd teńgege jetkenin jazǵan edik.
