SQO-da byltyr ekologtar 11 mln teńgege jýyq aıyppul salǵan

Soltústik Qazaqstan oblysynda byltyr ekologtar 15 tekseris júrgizip, nátıjesinde 22 zań buzýshylyqty anyqtady, dep habarlaıdy Kazinform.

SQO ekologııa departamentiniń málimetinshe, 15 tekseristiń 12-si aryz-shaǵymǵa baılanysty jospardan tys júrgizilgen.

Anyqtalǵan olqylyqtardy joıýǵa 21 usynym berilgen.

Jalpy somasy 10 mln 901 myń teńgege 26 ákimshilik aıyppul salynǵan. Onyń tek bireýi ǵana sot oryndaýshylarynyń kómegimen májbúrli túrde óndirilip alynyp jatyr.

Budan bólek aldyn ala bekitilgen keste boıynsha 220 sýbektini barmaı-aq tekserý josparlandy. Ol profılaktıkalyq sıpatta júrgizildi.

Nátıjesinde ekologııalyq zańnamany buzýdyń 95 deregi anyqtaldy.

Zańbuzýshylarǵa aqparattyq hat joldanyp, sýbektiler ony joıý boıynsha tıisti sharalar josparyn bekitti.

Departament taǵy úsh jaýapkershiligi shekteýli seriktestiktiń jumysyn toqtatý boıynsha sotqa júgindi.

«Agro-Eletsskoe» JShS memlekettik ekologııalyq saraptamanyń tıisti oń qorytyndysyn almaı sýarý júıesin salyp, paıdalanbaq bolǵan.

SQO mamandandyrylǵan aýdanaralyq ekonomıkalyq sot departamenttiń talap-aryzyn qanaǵattandyrdy.

Dál osyndaı sebeppen endi «Kırpıch SK» JShS de jańa jabdyqty paıdalanýdy toqtata turady.

Al «Sana-Torg» JShS-niń asfalt-beton zaýyty jumysy sottyń qaýlysymen ákimshilik is júrgizý tártibimen 1 jylǵa toqtatyldy.

Alaıda talap-aryz qaıtaryp alyndy.