SQO-da byltyr ekologııaǵa zııan keltirgen kásiporynǵa 18 mln teńgege jýyq aıyppul salyndy
PETROPAVL. KAZINFORM – Soltústik Qazaqstan oblysynda byltyr ekologııa departamenti 349 tekseris júrgizip, tekserýlerdiń qorytyndysy boıynsha 279 zań buzýshylyqty anyqtady.
SQO ekologııa departamentiniń basshysy Talǵat Sábıevtiń aıtýynsha, zań buzýshylyqtardy joıý týraly 107 uıǵarym berilip, onyń 93,5 % oryndaldy.
- Budan bólek 29,5 mln teńge somasyna 57 ákimshilik aıyppul salyndy. Onyń basym bóligi erikti túrde óndirildi. Qazir bireýi boıynsha májbúrlep óndirý qolǵa alynǵan, aıyppul mólsheri – 370 myń teńge shamasynda. Sot organdaryna qaraýǵa 4 is jiberildi. Sot 7,3 mln teńgeni óndirip alý týraly ákimshilik shara taǵaıyndaýǵa qaýly shyǵardy, - deıdi Talǵat Sábıev.
Ekologtar memlekettik ekologııalyq baqylaý aıasynda kásiporyndardan atmosferalyq aýa, avtokólikterden shyǵatyn gaz synamalaryn, topyraq, tabıǵı, sarqyndy jáne jerasty sýlarynyń synamalaryn alyp, normaǵa saı bolýyn qadaǵalap otyrady.
- «Rostan» JShS-de sý synamasy alynyp, kásiporyn júrgizilgen zertteýlerdiń nátıjesi boıynsha 18 mln teńgege jýyq aıyppul túrinde ákimshilik jaýapkershilikke tartyldy. «Petropavlovskoe» jelilik óndiristik-dıspetcherlik stantsııada, «Taıynsha maı» JShS, «Petropavl munaı bazasy» JShS-de topyraq synamasy alynyp, jalpy somasy 4,5 mln teńgege keltirilgen ekologııalyq zalaldy joıý boıynsha remedıatsııalaý baǵdarlamalary ázirledi, - deıdi departament basshysy.
Al kóktemgi sý tasqyny kezinde Esil ózeninen 64 sý synamasy alynǵan, tıisti normatıvterden asýdyń 37 jaǵdaıy anyqtaldy.
SQO-da QR ekologııalyq zańnamasyna sáıkes І sanattaǵy 3 nysan ónerkásiptik shyǵaryndylardy baqylaýdyń avtomattandyrylǵan júıelerin ornatýy tıis.
- «Sevkazenergo» AQ Petropavldaǵy 2-Jylý-elektr ortalyǵynyń №3 tútin murjasyna ornatty. Kásiporynǵa ornatylǵan júıe shyǵaryndylar týraly derekterdi «Qorshaǵan orta men tabıǵı resýrstardyń jaı-kúıi týraly Ulttyq derekter bankine» avtomatty túrde jiberedi.
Sondaı-aq, 31 mamyrǵa deıin JEO-2 jańa tútin murjasyna ornatý josparlanǵan, jabdyqtar jetkizildi. Sonymen qatar, kásiporyn Esil ózeninde sarqyndy sýlardy aǵyzý kózine de avtomattandyrylǵan júıeni ornatý boıynsha jumys júrgizip jatyr, jumys 31 shildege deıin atqarylady, - deıdi Talǵat Sábıev.
«Qyzyljar sý» JShS jáne Petropavl qalasy ákimdiginiń «Tazartý, sý burý jáne sý ótkizý qurylystary» MKK oblystyq bıýdjetten qarjy bólingen jaǵdaıda bul jumysty bıyl atqarmaq.
Buǵan deıin Petropavlda tehnoekopark jobasy qolǵa alynatyndyǵyn jazǵan edik.