SQO-da byltyr bes adam jumys barysynda mert boldy

PETROPAVL. KAZINFORM — Soltústik Qazaqstan oblysynda eńbekke baılanysty jazataıym oqıǵalar kezinde byltyr 38 adam zardap shekti, onyń beseýi kóz jumdy. 

Ulttyq statıstıka bıýrosy SQO boıynsha departamentiniń málimetinshe, abaısyzda jaraqattanǵandar sany 2023 jylmen salystyrǵanda ózgerissiz qalǵan. Óndiristegi qaýipsizdik máselesi ózektiligin joǵaltpaı otyr.

Zardap shekkenderdiń jalpy sanynyń 34,2% — áıelder, onyń bireýi mert boldy.

Jazataıym oqıǵaǵa ushyraǵandardyń jartysy memlekettik kásiporyndar men uıymdarda jumys istegen. Qalǵandarynyń 47,4% — jeke kásiporyndarda, al 2,6% — sheteldik zańdy tulǵalardyń menshigindegi kásiporyndarda eńbek etken.

Óndiristegi jazataıym oqıǵalar kezinde zardap shekkenderdiń 23% astamy ónerkásip, qurylys, kólik jáne basqa osy tektes qyzmetterdiń jumysshylary. Zardap shekkenderdiń eń kóbi — 8 adam óńdeý ónerkásibinde jumys istegen.

Óndiristegi jazataıym oqıǵalardyń negizgi sebepteri: 6 jaǵdaıda óreskel abaısyzdyq, taǵy sonshasynda eńbek qaýipsizdigi talaptary buzylǵan. 5 jaǵdaıda óndiristik apattar tirkelse, tórteýi — jumysty uıymdastyrýdaǵy kemshilikterden bolǵan. Ǵımarattar men jumys oryndarynyń qanaǵattanǵysyz jaǵdaıynan 4 oqıǵa, kólik quraldaryn paıdalaný kezinde qaýipsizdik talaptarynyń buzylýynan 3 oqıǵa jáne eńbek qaýipsizdigi boıynsha oqytýdaǵy olqylyqtarǵa qatysty 3 jaǵdaı tirkeldi.

14 adam jumys ornynda qulasa, 7 adam jol-kólik oqıǵalary kezinde jaraqattanǵan.

Sondaı-aq 9 adam jabyq synyq, 3 adam kúıik alsa, jeti adamdy ýly emes jándikter shaǵyp, zardap shekken.

Nátıjesinde byltyr óndiristik jazataıym oqıǵalarǵa baılanysty jalpy kólemi 20,3 mln teńge materıaldyq tólem jasaldy. Onyń ishinde eńbekke jaramsyzdyq paraǵy boıynsha — 17,4 mln jáne birjolǵy járdemaqy retinde — 2,9 mln teńge tólendi.

Buǵan deıin SQO-da balalardyń jaraqat alýy jıilegenin jazǵan edik.