SQO-da azyq-túlik baǵasyn negizsiz ósirgen 6 kásipker jazalandy
PETROPAVL. KAZINFORM – Soltústik Qazaqstan oblysynda byltyr saýda qyzmetin retteý salasyndaǵy zańnamany buzǵany úshin 31 kásipkerlik sýbekti ákimshilik jaýapkershilikke tartyldy, onyń altaýy azyq-túlik baǵasyn negizsiz ósirgen.
SQO saýda jáne tutynýshylardyń quqyqtaryn qorǵaý departamenti basshysy Qanat Jeńisbekulynyń aıtýynsha, áleýmettik mańyzy bar azyq-túlik taýarlaryna saýda ústemesiniń mólsheri 15%-dan aspaýy tıis. Bul «Saýda qyzmetin retteý týraly» QR Zańynda kórsetilgen.
«QR Ákimshilik quqyq buzýshylyq týraly kodekstiń 204-4-babynda Zańnyń osy normalaryn buzǵany úshin ákimshilik jaýapkershilik kózdelgen. Bir ret eskertiledi. Ákimshilik jaza qoldanylǵannan keıin bir jyl ishinde zań buzýshylyq qaıtalansa - shaǵyn kásipkerlik sýbektilerine – 10, orta kásipkerlik sýbektilerine – 75, iri kásipkerlik sýbektilerine - 300 AEK mólsherinde aıyppul salynady», - deıdi Qanat Jeńisbekuly.
Osy jyldyń qańtar-aqpan aılarynda Departament 13 kásipkerlik sýbektisin ákimshilik jaýapkershilikke tartty. Olar áleýmettik mańyzy bar azyq-túlik taýarlaryna saýda ústemesiniń mólsherin asyrǵan.
«Jazalanǵan bıznes sýbektileri birinshi surypty bıdaı unyn, kúrishti, qaraqumyq jarmasyn, 5%-dyq maıly súzbeni, taýyq etin, 72,5%-dyq sary maıdy, kúnbaǵys maıdy saýda ústemesiniń ruqsat etilgen mólsherinen asyryp, qymbatqa satqan. Bul zań buzý derekteri taýarlardy satyp alý men satýdyń elektrondyq shot-faktýralaryn taldaý barysynda anyqtaldy», - deıdi departament basshysy.
Áleýmettik mańyzy bar azyq-túlik taýarlary baǵasyn ustap turý úshin SQO ákimdigi janynan baǵa belgileý tizbegi boıynsha deldaldyq shemalardy tergeý jónindegi óńirlik komıssııa jumys isteıdi.
Byltyr komıssııanyń 85 otyrysy ótti. Tekseris aıasynda zańnamany buzýdyń 25 faktisi anyqtaldy.
