SQO-da byltyr azyq-túlik baǵasyn negizsiz kóterýdiń 40 deregi anyqtaldy
PETROPAVL. KAZINFORM – Soltústik Qazaqstan oblysynda ótken jyly azyq-túlikti qymbatqa satqandar 1 mln teńgeden astam aıyppul tóledi.

SQO boıynsha ekonomıkalyq tergeý departamenti tergeý basqarmasynyń anyqtaýshysy Dıas Qabeshtiń aıtýynsha, QR «Saýda qyzmetin retteý týraly» Zańynyń 9-babyna sáıkes shekti saýda ústemesiniń mólsheri óndirýshiniń satý baǵasynan nemese kóterme jetkizýshiniń satyp alý baǵasynan 15% aspaýy kerek. Alaıda jekelegen jetkizýshiler belgilengen normalardy elemeıdi, mysaly, deldal 300 teńgege kúrish satyp alyp, ony 450 teńgege satady. Saýda ústemesi 50% asqan, al ruqsat etilgeni - 15%. Saldarynan qarapaıym satyp alýshy zardap shegedi.
Departament sondaı-aq áleýmettik mańyzy bar azyq-túlik taýarlary naryǵynda jónsiz deldaldyqty anyqtaý jáne boldyrmaý, sondaı-aq ruqsat etilgen saýda ústemesiniń asyp ketýine jol bermeý boıynsha jumys júrgizedi.
Máselen, 2024 jyldyń qorytyndysy boıynsha 40-tan astam zań buzýshylyq anyqtaldy, nátıjesinde 1 mln teńgeden astam somaǵa aıyppul óndirildi. Al bıyl Saýda departamentine shara qabyldaý úshin 6 materıal jiberilgen. Budan basqa, áleýmettik mańyzy bar azyq-túlik taýarlaryn negizsiz qymbattatýdyń 8 deregi anyqtaldy. Deldaldyq shemalardy alyp tastaýdyń arqasynda jeke ónimniń qunyn 40% deıin tómendetýge múmkindik týdy.
- Azamattardyń quqyqtaryn qorǵaý, ekonomıkalyq qaýipsizdikti qamtamasyz etý, kásipkerliktiń adal sýbektilerin qoldaý, taza básekelestik úshin qolaıly jaǵdaılar jasaý ekonomıkalyq tergep-tekserý qyzmetiniń negizgi mindetteri. Al negizgi baǵyttar – bıýdjet qarajatyn urlaýdyń, alaıaqtyqtyń aldyn alý, salyq tóleýden jaltarý, qylmystyq jolmen alynǵan aqshany zańdastyrý, qarjy pıramıdalaryn uıymdastyrý jáne zańsyz oıyn bıznesi.
Byltyr «Kıbernadzor» júıesinde qumar oıyndar boıynsha 796 jarııalanym, 753 onlaın-kazıno jarnamasy, 43 onlaın-kazıno jáne qarjy pıramıdasynyń belgileri bar 112 saıt siltemesi buǵattaldy. Áleýmettik jelide qarjy pıramıdalary men qumar oıyndarynyń belgileri bar 7 akkaýnt anyqtaldy, - deıdi Dıas Qabesh.
Buǵan deıin SQO-da prokýrorlar qumar oıynǵa qunyqqan memlekettik qyzmetshilerdi jumystan shyǵarǵanyn jazǵan edik.