SQO-da byltyr 8 laýazymdy tulǵa qyzmetkerleriniń jumys ýaqytyn saqtamaǵany úshin jazalandy

PETROPAVL. KAZINFORM – Soltústik Qazaqstan oblysynda byltyr memlekettik qyzmette jumys isteıtin 100-ge jýyq qyzmetkerdiń quqyǵy qorǵaldy.

QR Memlekettik qyzmet isteri agenttiginiń SQO boıynsha departamentiniń basshysy Erjan Qarymsaqovtyń aıtýynsha, vedomstvo jumysynyń bir baǵyty - eńbek tártibiniń saqtalýyn qamtamasyz etý jáne memlekettik organdarda jumys ýaqyty rejıminiń saqtalýyn baqylaýda ustaý. Bul normalar Qazaqstan Respýblıkasynyń Memlekettik qyzmeti týraly Zańynda bekitilgen.

Al 2023 jylǵy mamyrdan bastap memlekettik organdarda jumys ýaqyty rejıminiń saqtalýyna monıtorıng júrgizý ókilettikter berildi. 

Soǵan qaramastan áli kúnge memlekettik qyzmetshilerdiń jumys ýaqytyn zańsyz asyrý faktileri kezdesedi.

- Ártúrli sebepterge baılanysty artyq jumys isteýge týra kelýi múmkin, biraq memlekettik qyzmetshilerdiń quqyǵyn buzbaı, tıisti aktilerdi resimdep, ústeme jumys tólenýi tıis.

Byltyr departament jumys ýaqyty rejıminiń saqtalýyn tekserý úshin 25 monıtorıng júrgizdi. Tekseris memlekettik organdarǵa barý arqyly da, jumys ýaqytyn esepke alýdy baqylaý júıeleriniń derekterin paıdalana otyryp qashyqtyqtan da júrgizildi, - deıdi departament basshysy.

Nátıjesinde 86 memlekettik qyzmetshige ótemaqy tólengen, onyń ishinde 80 qyzmetshige demalys saǵattary berildi, al 6 qyzmetkerge tıisti tólemder júrgizildi.

- Byltyr memlekettik qyzmet isteri departamenti qyzmetkerleriniń jumys ýaqytynyń normasyn zańsyz asyrǵany úshin memlekettik organdardyń 8 basshysyna qatysty 8 ákimshilik is toltyrdy. Olar 2-toptaǵy múgedektigi bar memlekettik qyzmetshilerdi Eńbek zańnamasynda kózdelgen 36 saǵattan asyryp, aptasyna 40 saǵattan jumysqa tartqan, - deıdi Erjan Qarymsaqov.

Buǵan deıin SQO-da bıyl memlekettik ákimshilik qyzmetshilerge 450-den astam tártiptik jaza qoldanylǵanyn jazǵan edik.