SQO-da byltyr 40-qa jýyq FAP, emhana salyndy

PETROPAVL. KAZINFORM – «Aýyldyq densaýlyq saqtaýdy jańǵyrtý» ulttyq jobasy aıasynda Soltústik Qazaqstan oblysynda medıtsınalyq-sanıtarııalyq alǵashqy kómektiń 46 nysany salynýy tıis.

Bul jospar aıaqtalýǵa jaqyn. Tek byltyr óńirde jańadan 38 nysan boı kóterdi.

Máselen Ǵ. Músirepov atyndaǵy aýdannyń Birlik jáne Vozvyshenka aýyldarynda eki jańa feldsherlik-akýsherlik pýnkt ashyldy. Ýálıhanov aýdany Kishkenekól aýylynda bir aýysymda 250 adam qabyldaıtyn emhananyń qurylysy aıaqtaldy.

- Byltyr 1,5 mlrd teńgege 15 medıtsınalyq nysanda kúrdeli jóndeý júrgizildi. Sonyń ishinde «Aýyl – el besigi» baǵdarlamasy aıasynda 163,2 mln teńge bólinip, bul qarajatqa 3 emdeý mekemesi jónge keltirildi.

Budan basqa, medıtsınalyq nysandardy ornalastyrý úshin aýyl sharýashylyǵy taýaryn óndirýshilerden ǵımarattardy satyp alý boıynsha jumystar qolǵa alyndy. Jergilikti bıýdjettiń 30 mln teńgesine byltyr Qyzyljar aýdanynyń Rassvet aýylynda ǵımarat satyp alyndy. Oǵan feldsherlik-akýsherlik pýnkt ornalastyrylady, - deıdi SQO densaýlyq saqtaý basqarmasynyń basshysy Qanysh Bıjanov.

Medıtsınalyq uıymdardyń materıaldyq-tehnıkalyq jabdyqtalýy da nazarda. Byltyr osy maqsatqa óńirde 5,4 mlrd teńge bólindi.

Saladaǵy kúrdeli másele – kadr jetispeýshiligi. Qazir óńirge kelgen mamandarǵa 1 -5 mln teńge mólsherinde kóterme aqy berilip keledi. Byltyr osylaısha 67 dárigerge 234 mln teńge tólendi.

- Petropavlda «Dárigerler úıi» bar, sol jerden bos baspanamen qamtımyz. Aýdandarda jergilikti atqarýshy organdar qyzmettik úı beredi. Úsh jyl jalǵa alatyn páterdiń aqysyn tóleýge kómektesemiz.

Bıyl bir ret beriletin kóterme aqy mólsherin 8,5 mln teńgege deıin ósirýdi josparlap otyrmyz. Joba daıyn. Bul soma asa qajet mamandarǵa beriledi, tizimin jasadyq.

Jergilikti bıýdjet esebinen rezıdentterdi oqytýǵa 50 grant bólindi, qazir 34 mamanmen kelisimge otyryp, oqytyp jatyrmyz, - deıdi basqarma basshysy.

Buǵan deıin Petropavlda balalar lageri sanatorly-kýrorttyq keshenge aınalatyndyǵyn jazǵan edik.