SQO-da byltyr 4 myńnan astam ekologııalyq synama alyndy
PETROPAVL. KAZINFORM — Soltústik Qazaqstan oblysynda ekologııalyq ahýaldy baqylaý aıasynda sý, aýa, topyraq jáne radıatsııalyq fon boıynsha byltyr 4183 ekologııalyq synama alyndy.
SQO ekologııa departamentiniń málimetinshe, 3558 synama atmosferalyq aýaǵa tıesili, avtokólik shyǵaryndylary boıynsha 338, sý boıynsha 274, topyraqtan 4, sondaı-aq 9 radıatsııalyq ólshem júrgizilgen.
— Jergilikti polıtsııa qyzmetimen birlesip, «Taza aýa» aktsııasyn jáne «Qaýipsiz jol» jedel-profılaktıkalyq is-sharasyn ótkizdik. 41 avtokólik tekserilip, olardyń teń jartysynda tútin mólsheriniń normadan asqany anyqtaldy. Atalǵan faktiler boıynsha júrgizýshilerge QR ÁQBtK-niń 334-baby negizinde ákimshilik sharalar qoldanyldy, — deıdi departament basshysy Talǵat Sábıev.
«Qazgıdromet» kásiporny oblystyq fılıalynyń derekterine sáıkes, byltyr oblysta kúkirtsýtekpen atmosferalyq aýanyń joǵary lastanýynyń 11 faktisi tirkelgen.
— Osyǵan baılanysty departament qyzmetkerleri «Qyzyljar sý» JShS-niń káriz-tazartý qurylystary mańynda jáne «Bıoprýd» jınaqtaýshy toǵany aýmaǵynda birneshe ret ólsheý jumystaryn júrgizdi. Nátıjesinde kúkirtsýtegi boıynsha shekti ruqsat etilgen kontsentratsııadan asý anyqtalmady. Soǵan qaramastan, aýadaǵy jaǵymsyz ıiske baılanysty máseleni júıeli sheshý úshin oblys ákimdigine, prokýratýra men máslıhatqa usynystar joldandy. Atap aıtqanda, aǵyndy sý jınaqtaýshy «Bıoprýdty» tunbalardan tazartý jáne Petropavldaǵy káriz-tazartý qurylystaryn tolyq tsıkldi tazartý júıesine kóshirý qajettigi kórsetildi, — deıdi departament basshysy.
Departamenttiń bastamasymen 2026–2028 jyldarǵa arnalǵan Qorshaǵan ortany qorǵaý jónindegi is-sharalar jospary jasaldy. Oǵan Petropavldaǵy káriz-tazartý qurylystaryn aıaqtaýǵa arnalǵan jobalyq-smetalyq qujattama ázirleý jáne «Bıoprýd» jınaqtaýshy toǵanyn túbindegi shógindilerden tazartý jobasyn daıyndaý sııaqty sharalar engizildi.
Talǵat Sábıevtiń aıtýynsha, qazir bul jospar QR Ekologııa jáne tabıǵı resýrstar mınıstrligine kelisý úshin jiberilgen.
Buǵan deıin SQO-da sońǵy bes jylda ruqsatsyz qoqys oryndary bes ese qysqarǵanyn jazǵan edik.