SQO-da bilim bólimi men bóbekjaıdyń esepshileri 90 mln teńgeni qaltasyna basqan
SQO sybaılas jemqorlyqqa qarsy qyzmettiń málimetinshe, QR Sybaılas jemqorlyqqa qarsy is-qımyl agenttigi el kóleminde orta jáne mektepke deıingi bilim berý salasyna sybaılas jemqorlyq táýekelderine syrtqy taldaý júrgizdi.
Nátıjesi Soltústik Qazaqstan oblysy ákimdigi janyndaǵy sybaılas jemqorlyqqa qarsy is-qımyl jónindegi vedomstvoaralyq komıssııanyń otyrysynda qaraldy.
Sybaılas jemqorlyqqa qarsy is-qımyl agenttiginiń oblystyq departamentiniń basshysy Sergeı Perovtyń aıtýynsha, sońǵy jyldary el boıynsha bilim salasynda úsh júzden astam jemqorlyq qylmys jasalyp, 143 adam sottalǵan.
«Óńirde negizinen josparlaý jáne eńbekaqy tóleý qoryna basymdyq berildi. Oǵan bilim salasyna bólingen oblys bıýdjetiniń 80%-ǵa jýyǵy jumsalady. Sybaılas jemqorlyqqa ákeletin júıeli problemalar anyqtaldy. Jalaqyny, túrli qosymsha aqylardy zańsyz esepteý, sondaı-aq naqty oryndalmaǵan jumystardǵa aqy tóleý jáne basqa jolmen bıýdjet qarajatyn urlaý shemalary ashyldy», - deıdi Sergeı Perov.
Mysaly, departament taldaý barysynda aǵylshyn tili muǵalimine jalpy somasy 3 mln teńgeden astam aqy negizsiz tólengenin anyqtap, aqsha qaıtaryldy.
Sondaı-aq aýdandyq bilim bólimi býhgalteriniń jumys istemeıtin adamdarǵa jalaqy aýdarý jáne bóbekjaı-baqshanyń býhgalteriniń óz bank esepshotyna aqsha aýdarýy arqyly bıýdjet qarajatyn jymqyrý faktilerin anyqtady.
Aldyn ala shyǵyn - shamamen 90 mln teńge.
«Árbir fakti boıynsha tekserý júrgiziledi, qorytyndysy boıynsha tıisti quqyqtyq baǵa beriledi. Búgingi tańda departament jalpy somasy 50 mln teńgeden asatyn urlyq faktileri boıynsha 2 qylmystyq isti tirkedi», - deıdi Sergeı Perov.
Taldaý qorytyndysy boıynsha barlyǵy 20 sybaılas jemqorlyq táýekeli anyqtaldy, olardy joıý úshin 34 usynym ázirlendi.
