SQO-da bıyl zorlyq-zombylyqqa qatysty 12 bala otbasynan alyndy

PETROPAVL. KAZINFORM – Soltústik Qazaqstan oblysynda prokýratýra jyl basynan beri kámeletke tolmaǵandardyń quqyqtary men múddelerin buzýdyń bir myńnan astam faktisyn anyqtady.

SQO prokýratýrasynyń málimetinshe, qadaǵalaý organynyń mobıldi toptary bıyl táýekel tobyna jatatyn 11 myńnan astam otbasyn tekserdi. 

Búgingi tańda áleýmettik kómek qajet, qujattardy rásimdeý jáne basapan kezegine turý boıynsha máseleleri bar 140 otbasyǵa qoldaý kórsetildi. 

Prokýratýranyń talaby boıynsha kámeletke tolmaǵandardyń isteri jónindegi komıssııa otyrystarynda 44 otbasynyń isi qaraldy, nátıjesinde fızıkalyq qaýip-qaterge baılanysty 12 bala otbasynan alyndy, 272 zańdy ókil balalardy tárbıeleý boıynsha mindetterin oryndamaǵany úshin ákimshilik jaýapkershilikke tartyldy.

«Balalar salasyndaǵy quqyq qorǵaý ınstıtýtyn nyǵaıtý maqsatynda osy jyldyń qyrkúıeginde oblys prokýratýrasynda prokýror Qaırat Ábdihanov pen SQO-daǵy bala quqyqtary jónindegi óńirlik ýákil Sáýle Suraǵanovanyń kezdesti. Іs-sharada ózara is-qımyl, jedel aqparat almasý, sondaı-aq kámeletke tolmaǵandardyń quqyqtaryn qorǵaýǵa qatysty birlesken kóshpeli is-sharalarǵa qatysý jáne yntymaqtastyq máseleleri talqylandy. Jumys qorytyndysy boıynsha tıisti memorandýmǵa qol qoıyldy», - deıdi vedomstvo ókilderi.

Jalpy, jyl basynan beri kámeletke tolmaǵandardyń quqyqtaryna qatysty 1 myńnan astam zań buzýshylyq anyqtaldy, 47 qadaǵalaý aktisi engizildi, olardy qaraý nátıjeleri boıynsha 18 527 tulǵanyń quqyǵy qorǵalǵan. Nátıjesinde 854 adam jaýapkershilikke tartyldy, 26 mln teńge somasyna zalal óndirildi.

Buǵan deıin SQO-da mektep oqýshysy synyptasyna pyshaq suǵyp alǵanyn jazǵan edik.