SQO-da bıyl zııankestermen kúresý úshin 211,5 myń ga jýyq egis alqaby óńdeledi

PETROPAVL. KAZINFORM – Soltústik Qazaqstan oblysynda egis alqabyn túrli aramshópterden, zııankester men aýrýlardan qorǵaý úshin dala jumystary júrgizilip jatyr. Bıyl aramshópter men zııankesterge qarsy egistikterdi hımııalyq óńdeýge pestıtsıdterdi sýbsıdııalaý baǵdarlamasy aıasynda 11,3 mlrd teńge bólindi.

SQO aýyl sharýashylyǵy jáne jer qatynastary basqarmasy baspasóz qyzmetiniń málimetinshe, kóktemgi egin egý jumysyn aıaqtaǵan dıqandar alqaptardy hımııalyq óńdeýdi bastap ketti.

Qyzyljar aýdanynyń «Elim-Qyzyl Jar» JShS-de tehnıka kún batqannan keıin nemese tańerteń erte shyǵyp, egisti dárilep jatyr. Barlyq jumystyń 65% atqarylǵan. Desek te hımııalyq óńdeý jaz boıy júrgiziledi. 

«Janar-jaǵarmaı jetkilikti. Mıneraldy tyńaıtqyshty jylda qoldanamyz, jaqynda alqapty sýarý tehnologııasyn engizbekpiz. Jalpy 1,2 myń ga egis alqabymyz bar. Bıylǵy egis naýqany jaqsy ótti, jumys der kezinde aıaqtaldy. Bıdaı, arpa, suly, raps, zyǵyr, burshaq, kartop, sábiz jáne qyzylsha egildi. Aýyl sharýashylyǵy tehnıkamyz jańa, lızıngke, nesıege aldy. Sondaı-aq 6 myń tonna bolatyn 2 kókónis qoımasyn saldyq. Ónimdi oblys ortalyǵyna jetkizemiz. Endi jańa tehnologııa qoldanyp, kókónisterdi jýatyn bolamyz», - deıdi sharýashylyq dırektory Oleg Ivanov. 

SQO boıynsha bıyl 3,2 mln ga alqap aramshópke qarsy, 211,4 myń ga -zııankesterge jáne 599,2 myń ga – túrli ósimdik aýrýlaryna qarsy hımııalyq óńdeýden ótedi. 

«Egis alqaptarynda hımııalyq óńdeý júrgizilip jatyr. Aramshópterge qarsy gerbıtsıdtik óńdeý boıynsha jospardyń 32,5% nemese 1024,3 myń ga, aýrýlarǵa qarsy 159,2 myń ga nemese jospardyń 26,6% jáne zııankesterge qarsy 126,5 myń ga nemese jospardyń 59,8% óńdeldi», - deıdi SQO aýyl sharýashylyǵy jáne jer qatynastary basqarmasynyń basshysy Meıram Meńdibaev. 

Buǵan deıin SQO-da úıirli shegirtke boıynsha jaǵdaıdyń turaqty ekenin jazǵan edik.