SQO-da bıyl jylytý maýsymyna daıyndyqqa 31 mlrd teńge bólindi

PETROPAVL. KAZINFORM – Soltústik Qazaqstan oblysynda qyrkúıek aıynda jylytý maýsymy bastalady. Sýyqtyń túsýine birer apta ǵana qalǵanymen, óńir turǵyndarynyń tek 41% ǵana qajetti kómirdi túsirip alǵan. 

SQO-nyń jylytý maýsymyna daıyndyq barysy óńirlik kommýnıkatsııalar qyzmetinde ótken brıfıngte pysyqtaldy. Oblystyq energetıka jáne turǵyn úı-kommýnaldyq sharýashylyq basqarmasynyń basshysy Danııar Qýanyshbaevtyń aıtýynsha, bıyl jylytý maýsymyna daıyndalý úshin 31 mlrd teńge, sonyń ishinde respýblıkalyq bıýdjetten 5,7 mlrd teńge, oblystyq bıýdjetten 1 mlrd teńge bólingen. Al 24 mlrd teńge jeke ınvestıtsııalar.

«Petropavldaǵy 2-Jylý-elektr ortalyǵynda №1 qazandyq agregaty, №3,6 týrboagregat kúrdeli jóndelip jáne №1 tútin murjasy salynyp jatyr. Bul maqsatqa jalpy 17,6 mlrd teńge josparlandy, sonyń 7,23 mlrd teńgesi ıgerildi», - dedi Danııar Qýanyshbaev.

Mamannyń aıtýynsha, jumys kestege saı atqarylyp jatyr. Máselen 2022 jyly qulaǵan tútin murjasynyń ornyna salynyp jatqan jańa murja qazir 30 metrge kóterilgen.

«Eń qıyn jumys artta qaldy. Áli de oqpany 150 metrge deıin kóteriledi. Bul jumysty 15 qarashaǵa deıin aıaqtaýymyz qajet. Al qalǵan jumystar kelesi jyly aıaqtalady. Qalǵan eki murja tehnıkalyq tekseristen ótti. Bıyl qysty byltyrǵydaı sol ekeýimen ótkizemiz», - dedi Danııar Qýanyshbaev.

SQO-daǵy jylý jelileri shamamen 70% tozǵan. Bıyl jóndeýge 6 mlrd teńgeden astam qarajat bólindi.

Petropavl qalasynda 1170 kópqabatty turǵyn úı bolsa, qazir sonyń 84% ǵana jylytý jelisinde jýyp-shaıý jumysyn júrgizgen. Jeke úı turǵyndary da qysqa daıyndalýǵa asyǵar emes. Halyqtyń jylytý maýsymynda kómirge degen qajettiligi – 399 myń tonna. Turǵyndar tek 146 myń tonnany, ıaǵnı 41% ǵana túsirip alǵan.

«Kómir baǵasy markasyna baılanysty 12-21 myń teńge aralyǵynda. Qatty otyn kestege saı jetkizilip jatyr, qazir tuıyqtarda 34 myń tonnadan astam kómir jatyr. Bıýdjettik uıymdar jylytý maýsymynda 146 myń tonna kómir jaǵady, qazir 124 myń tonnasy jetkizildi. Jalpy densaýlyq saqtaý, bilim berý uıymdary qysqy jylytý maýsymyna 99% daıyn», - dedi basqarma basshysy.

Buǵan deıin SQO-daǵy 50 shaqty mektepte ınternet jyldamdyǵy óte tómen ekendigin jazǵan edik.