SQO-da bıyl jeti adam kene entsefalıtin juqtyrdy
PETROPAVL. KAZINFORM — Soltústik Qazaqstan oblysynda kún jylynǵaly 766 adamdy kene shaqty.
SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, qan sorǵyshtardan zardap shekkenderdiń 217-si — 14 jasqa deıingi bala. Byltyr osy aralyqta kene shaqqan 810 adam medıtsınalyq kómekke júgingen, onyń 207-si bala bolǵan.
Jyldyń alǵashqy jeti aıynda oblysta kene entsefalıtin juqtyrýdyń 7 jaǵdaıy tirkeldi. Bul 2025 jyldyń sáıkes kezeńindegi kórsetkishpen birdeı.
Mamandar halyq arasyndaǵy «kene tek kóktem mezgilinde ǵana qaýipti» degen pikirdiń qate ekenin eskertedi.
— Bizdiń óńirde kene mamyr-maýsym aıynda asa belsendi bolyp keledi. Biraq sáýir aıynan bastap qazan aıyna deıin bolady. Sol sebepti tabıǵat aıasyna shyqqanda keneden qorǵaný úshin birneshe qarapaıym erejeni saqtaǵan jón. Eń aldymen, deneni barynsha jaýyp turatyn ashyq tústi kıim kıgen durys. Kıim qoldyń bilezik jáne tobyq tusynda denege tyǵyz janasýy kerek. Sonymen qatar keneden qorǵaıtyn repellentterdi qoldanýǵa bolady. Tabıǵatta júrgende shóbi qalyń jerlerge barynsha jaqyndamaǵan jón, — deıdi departament basshysynyń orynbasary Arman Kúshbasov.
Mamandar úıge kelgennen keıin ózińizdi, balalardy jáne úı janýarlaryn da muqııat tekserý qajettigin eske salady.
Al deneden jabysqan keneni kórgen jaǵdaıda eń aldymen sabyr saqtaǵan jón. Múmkindik bolsa, medıtsınalyq uıymǵa baryp, keneni qaýipsiz túrde aldyrǵan durys. Dárigerler keneniń aýrý juqtyrǵan-juqtyrmaǵanyn da baǵalaıdy.
— Eger birden medıtsınalyq kómekke júginý múmkin bolmasa, keneni arnaıy quralmen nemese pıntsetpen abaılap alyp tastaýǵa bolady. Jándikti terige barynsha jaqyn jerinen ustap, aqyryn alý qajet. Kene alynǵannan keıin shaqqan jerdi antıseptıkpen óńdegen jón. Múmkindik bolsa, alynǵan keneni keıin belgilengen tártippen zertteý úshin saqtap qoıǵan durys. Keneni qolmen janshýǵa, qatty tartýǵa nemese burap shyǵarýǵa bolmaıdy. Sondaı-aq oǵan maı, spırt, vazelın, tyrnaq boıaýyn jaǵý sııaqty halyqtyq ádisterdi qoldanbaǵan durys. Keneni kúıdirýge de bolmaıdy, — deıdi Arman Kúshbasov.
Osyǵan deıin SQO-da 16 jastaǵy jasóspirim kene entsefalıti vırýsyn juqtyryp, em alǵanyn jazǵan edik.
