SQO-da bıyl jazda shomylyp, demalýǵa bolatyn 61 oryn belgilendi
PETROPAVL. KAZINFORM - Soltústik Qazaqstan oblysynda jazda shomylýǵa bólingen oryndardyń altaýy ǵana kommýnaldyq menshikte, qalǵan 55-in jeke kásipkerler jalǵa alǵan.
Oblystyq ákimdikte jazǵy demalys maýsymyn qaýipsiz ótkizý máseleleri qaraldy.
SQO Tótenshe jaǵdaılar departamentiniń bastyǵy Jomart Asqarovtyń aıtýynsha, óńirde shamamen 60 ózen, 2300-den astam kól jáne 127 qazanshuńqyr bar. Eń qaýipti sý aıdyndarynyń qataryna Esil ózeni, Pestroe, Solenoe, Lebıaje, Úlken Torańǵul, Shalqar jáne Imantaý kólderi jatady.Demalys oryndarynyń 13-i osy kólderde ornalasqan.
Máselen, Petropavl turǵyndary men qonaqtary úshin eki jaǵajaı jaraqtandyryldy. Demalys oryndarynyń 47-si – Aıyrtaý aýdanynda, Qyzyljar aýdanynda – 6, Ǵ.Músirepov atyndaǵy aýdanynda ekeýi ornalasqan. Esil, Mamlıýt, Shal aqyn jáne Jambyl aýdandarynda bir orynnan belgilendi.
- Aıyrtaý aýdanyndaǵy Shalqar men Imantaý kýrorttyq aımaqtary negizgi týrıstik baǵyt. Osyǵan baılanysty tótenshe jaǵdaılar kezinde sheteldik týrıstermen jedel ári sapaly baılanys ornatý maqsatynda oblystyq Tótenshe jaǵdaılar departamenti men Qozybaev ýnıversıteti arasynda ózara yntymaqtastyq týraly memorandýmǵa otyrdy, - deıdi Jomart Asqarov.
Byltyr SQO-da jańa qutqarý stantsııalary iske qosyldy. Teplıchnoe aýylynda ámbebap qutqarý stantsııasy, Esil ózeninde jańa býyndaǵy modýldik stantsııa, Aıyrtaý aýdanyndaǵy Shalqar jáne Imantaý kólderinde qutqarý beketteri ashyldy. Sonymen qatar kún ysyǵan kezde qaýipti ýchaskelerde qosymsha 6 mobıldi post qoıý josparlanyp otyr. Olar Chernoe, Solenoe, Lebıaje, Baıan, Meńgeser kólderinde jáne Esil ózeninde jumys isteıdi.
- Byltyr óńirde sýda adam ólimi tirkelmedi. Bul - profılaktıkalyq jumystardyń nátıjesi. Bıyl Petropavl qalasy aýmaǵyndaǵy Esil ózeni boıynda drondar arqyly patrýldeý júrgiziletin bolady.
2025 jyly sý aıdyndaryndaǵy qaýipsizdik erejelerin buzǵany úshin 98 adam ákimshilik jaýapkershilikke tartyldy, - deıdi departament bastyǵy.
Ákimdik otyrysynda sheshimin kútken máseleler jaıynda da aıtyldy.
- Sý mańyndaǵy demalys oryndarynyń ıeleri men jalǵa alýshylardy qoǵamdyq qutqarýshylar men medıtsına qyzmetkerleri bar arnaıy jabdyqtalǵan qutqarý beketterin ashýǵa mindetteý qajet. Budan bólek, ruqsat etilmegen shomylý oryndaryna tyıym salatyn jáne eskertý belgilerin ornatý úshin aldyn ala bıýdjet qarajatyn bólý kerek, - deıdi Jomart Asqarov.
Buǵan deıin Aqtóbede jaǵajaılardyń kóbi shomylý maýsymyna daıyn emes ekenin jazǵan edik.
