SQO-da bıyl jańadan 57 veterınarııalyq pýnkt jáne eki stantsııa ashylady

PETROPAVL. KAZINFORM – Soltústik Qazaqstan oblysynda bıyl veterınarııalyq qyzmettiń ınfraqurylymyn jaqsartý boıynsha jumys jalǵaspaq.

SQO veterınarııa basqarmasynyń basshysy Janat Ámirjanovtyń aıtýynsha, bıylǵa negizgi mindet - veterınarııalyq is-sharalardy ýaqtyly jáne sapaly júrgizý. Bıyl ótken jylmen salystyrǵanda vaktsına egý kólemi 29% nemese janýarlar men qustarǵa vaktsına egý boıynsha 1,4 mln-nan astam manıpýlıatsııaǵa artady.

Sondaı-aq, 57 veterınarııalyq pýnkt jáne 2 aýdandyq veterınarııalyq stantsııa satyp alý josparlanyp otyr.

Máselen, Jambyl aýdanynyń Kladbınka, Blagoveşenka jáne Býdennoe aýyldaryna úsh veterınarııalyq pýnkt satyp alynbaq.

- Veterınarııalyq qyzmettiń materıaldyq-tehnıkalyq bazasyn jaqsartý jáne veterınarııalyq is-sharalardy ýaqtyly júrgizý óńirdiń veterınarııalyq-sanıtarııalyq qaýipsizdigin, qolaıly epızootııalyq jaǵdaıyn qamtamasyz etýdiń kepili.

Byltyr tek osy aýdanda ǵana 428 myń vaktsına egilip, 94 myńǵa jýyq dıagnostıkalyq zertteý júrgizildi. «Aýyl sharýashylyǵy janýarlaryn birdeılendirý» derekqoryna 28 myńnan astam tól engizildi.

Bıyl aýdanda 460 myńǵa jýyq vaktsına egý, 86 myń dıagnostıkalyq jáne allergııalyq zertteýler júrgizý josparlanǵan, - deıdi Janat Ámirjanov.

SQO-da bıyl da mal qorymdaryn salý, kómekshi veterınarııalyq jabdyqtar satyp alý boıynsha jumys jalǵasady.

Esterińizge salaıyq, buǵan deıin Aýyl sharýashylyǵy vıtse-mınıstri Amanǵalı Berdalın Qazaqstanda mal aýrýy 51% tómendegenin aıtqan edi.