SQO-da bıyl veıpke qatysty jeti qylmystyq is qozǵaldy

PETROPAVL. KAZINFORM — Soltústik Qazaqstan oblysynda prokýrorlar veıpke qatysty jaýapkershilikti eske saldy.

SQO prokýrorynyń aǵa kómekshisi Maksım Dorovıktiń aıtýynsha, bıyl óńirde jeti aıda 7 qylmystyq is tirkelgen. Máselen, Petropavl turǵyny áleýmettik jelide veıp satatyny týraly habarlandyrý bergen. Sot er adamdy 50 AEK mólsherinde, 200 myń teńge shamasynda aıyppul tóleýge mindettedi.

Mamannyń aıtýynsha, qoǵamda veıpti temekiniń qaýipsiz balamasy retinde qabyldaıtyn qate uǵym qalyptasqan. Ol ásirese jastar men jasóspirimder arasynda suranysqa ıe. Osyǵan baılanysty 2024 jyldan bastap el boıynsha veıpter men olardyń quramdas bólikterin óndirýge, ákelýge, satýǵa jáne taratýǵa tyıym salyndy.

— Qylmystyq jaýapkershilik kózdelgen. QR Qylmystyq kodeksiniń 301-1-baby boıynsha 200 AEK-ke deıin aıyppul nemese 200 saǵatqa deıin qoǵamdyq jumys nemese 50 táýlikke deıin qamaýǵa alý jazasy qarastyrylǵan. Qylmys qaıtalanǵan nemese aýyr jaǵdaıda — múlkin tárkileýmen 5 jylǵa deıin bas bostandyǵynan aıyrý kózdelgen, — deıdi Maksım Dorovık.

SQO prokýrorynyń kómekshisi Marat Qazıevtiń málimetinshe, 2025 jylǵy 16 shildede qabyldanǵan zańǵa sáıkes, endi satý nemese taratý maqsatynda saqtaý, jóneltý jáne tasymaldaý faktileri úshin qylmystyq jaýapkershilik bar. Bul zań kúshine 60 kúnnen keıin enedi.

— Veıpter men quramynda nıkotıni bar shegilmeıtin temeki buıymdarynyń saýdasy — jaı quqyq buzýshylyq emes, qylmystyq áreket. Zańdy bilmeý qylmystyq jaýaptylyqtan bosatpaıdy jáne barlyq zańsyz faktiler týraly quqyq qorǵaý organdaryna habarlaý qajet ekenin eskertemiz, — deıdi prokýrorlar.

Esterińizge salaıyq, elimizde shylym shegetinder azaıyp, veıp pen elektrondy temekige áýestenýshiler sany artqanyn jazǵan edik.